বিগত বৰ্ষৰ নবেম্বৰ আৰু ডিচেম্বৰ মাহত ব্ৰহ্মপুত্ৰ আৰু চিয়াং নৈৰ পানী অতি লেতেৰা আৰু বিষাক্ত হৈ পৰাৰ সন্দৰ্ভত অনুসন্ধানৰ বাবে কেন্দ্ৰীয় চৰকাৰে পঠিওৱা এটা উচ্চস্তৰীয় দল বুধবাৰে পাছিঘাটত উপস্থিত হয়।
কেন্দ্ৰৰ গৃহ মন্ত্ৰ্যালয়ৰ যুটীয়া সচিব শ্ৰীপ্ৰকাশৰ নেতৃত্বত অহা ছজনীয়া দলটোৱে পাছিঘাটত চৰজমিন তদন্ত কৰাৰ লগতে আকাশমাৰ্গেৰেও পৰ্যবেক্ষণ কৰে।
দলটোৱে চিয়াং আৰু ব্ৰহ্মপুত্ৰৰ পানীত হঠাৎ হোৱা পৰিৱৰ্তনৰ বিষয়টো অনুসন্ধান কৰাৰ লগতে ২০১৭ চনৰ প্ৰলয়ংকৰী বানত হোৱা ক্ষয়-ক্ষতিৰ সম্পৰ্কেও বুজ লয় বুলি কেন্দ্ৰীয় চৰকাৰৰ দলটোক সহায় কৰা ইষ্ট চিয়াং জিলাৰ উপায়ুক্ত টামিঅ’ টাটাকে জানিবলৈ দিয়ে।
মন কৰিবলগীয়া যে ডিচেম্বৰ মাহৰ আগভাগত কংগ্ৰেছী বিধায়ক নিনং এৰিঙে চিয়াঙৰ পানীৰ গুণগত মানৰ হঠাৎ পৰিৱৰ্তন আৰু পাচিঘাটত নদীখন শুকাই অহা বিষয়টোত গভীৰ উদ্বেগ প্ৰকাশ কৰি এই ক্ষেত্ৰত চীন চৰকাৰৰ লগত আলোচনা কৰিবলৈ অনুৰোধ জনাই প্ৰধান মন্ত্ৰীলৈ পত্ৰ প্ৰেৰণ কৰিছেল।
ইয়াৰ উপৰি অসম চৰকাৰেও বিষয়টোক গুৰুত্ব আৰোপ কৰি ৰাজ্যৰ বিভিন্ন স্থানত ব্ৰহ্মপুত্ৰৰ পানীৰ নমুনা সংগ্ৰহ কৰি অনুসন্ধানৰ বাবে আই আই টি, গুৱাহাটীকে ধৰি দেশৰ কেইবাটাও লেবৰেটৰীলৈ প্ৰেৰণ কৰিছিল।
