সাহিত্য একাডেমি বঁটা প্ৰাপ্ত বিশিষ্ট গল্পকাৰ লেখক কুলধৰ শইকীয়াৰ নৱতম গল্প সংকলণ ‘If A River and other stories’ অহা শনিবাৰে প্ৰকাশ পাব।
অসমীয়াৰ পৰা ইংৰাজীলৈ অনুবাদিত গল্প সংকলণখন ৯ ফেব্ৰুৱাৰিৰ পৰা শংকৰদেৱ কলাক্ষেত্ৰত অনুষ্ঠিত হ’বলগীয়া ব্ৰহ্মপুত্ৰ লিটাৰেৰী মহোৎসৱৰ দ্বিতীয় দিনা অৰ্থাৎ ১০ ফেব্ৰুৱাৰিত আবেলি ৩:৩০ বজাত উন্মোচন কৰা হ’ব।
গ্ৰন্থখন অসম প্ৰকাশন পৰিষদ আৰু নেশ্যনেল বুক ট্ৰাষ্ট অব ইণ্ডিয়াৰ যুটীয়া সহযোগত ৰত্ন বুকছে প্ৰকাশ কৰি উলিয়াইছে।
উল্লেখযোগ্য যে বিশিষ্ট গল্পকাৰ কুলধৰ শইকীয়া এগৰাকী ভাৰতীয় আৰক্ষী সেৱা বিষয়া আৰু বৰ্তমান তেওঁ গুৱাহাটীৰ আইন শৃংখলা বিভাগৰ অতিৰিক্ত পৰিচালন সঞ্চালকৰ দ্বায়িত্বত আছে।
নিজ ক্ষেত্ৰত আগবঢ়োৱা উৎকৃষ্ট সেৱাৰ বাবে তেওঁ দুবাৰকৈ ৰাষ্ট্ৰপতিৰ আৰক্ষী মেডেল লাভ কৰি কৰিছে। ইয়াৰ উপৰি তেওঁ ২০০০ চনত কথা বঁটা লাভ কৰাৰ লগতে ২০১৫ চনত তেওঁৰ চুটি গল্প সংকলণৰ বাবে সাহিত্য একাডেমি বঁটা লাভ কৰিছিল।
অসম প্ৰকাশন পৰিষদ আৰু নেশ্যনেল বুক ট্ৰাষ্ট অব ইণ্ডিয়াই যৌথ ভাবে আয়োজন কৰা মহোৎসৱটো ১১ ফেব্ৰুৱাৰিত সামৰণি পৰিব।
মহোৎসৱটোত বিশ্বৰ বিভিন্ন প্ৰান্তৰ পৰা অহা প্ৰায় ১২০ গৰাকী লেখক সাহিত্যিকে অংশগ্ৰহণ কৰিব।
