ধনশিৰি মহকুমাৰ বৰপথাৰত বিষাক্ত সুৰা সেৱন কৰি সাতজনকৈ লোকৰ মৃত্যু হোৱাৰ ঘটনাই গোটেই অঞ্চলটোতে চাঞ্চল্যৰ সৃষ্টি কৰিছে। শুকুৰবাৰে আৰম্ভ হোৱা এই ঘটনাত শনিবাৰলৈকে সাত জন লোকে প্ৰাণ হেৰুৱাব লগা হৈছে। তদুপৰি আন দহজন লোক আক্ৰান্ত হৈছে।
জানিব পৰা মতে বৰপথাৰৰ নগৰৰ চাৰি নং ৱাৰ্ডৰ কালীবাড়ীৰ পিন্টু পাল নামৰ লোকজনৰ ছাট হাউছত অবৈধভাৱে বিক্ৰী কৰা চুলাই মদ সেৱন কৰাৰ পিছতেই লোককেইজনৰ মৃত্যু হৈছে। শৌচ, বমি, পেটৰ বিষত আক্ৰান্ত হৈ মুখেৰে ফেন ওলাই মৃত্যুবৰণ কৰা সুৰাপায়ী লোককেইজনে উক্ত ছাট হাউছৰ পৰা সুৰা ক্ৰয় কৰি খোৱাৰ পিছতেই এইদৰে প্ৰাণ হেৰুৱাবলগীয়া হৈছে বুলি সকলোৱে নিশ্চিত হৈছে।
উক্ত ছাট হাউছৰ সুৰা ক্ৰয় কৰি খাই প্ৰাণ হেৰুওৱা লোক কেইজন হ’ল- চানু দাস, কান্তা হৰিজন, ধৰণী দেৱী, দীপক দেৱ, প্ৰকাশ কৈৰী, প্ৰভু কুমাৰ আৰু বুধুৱা ৰাজপুত। লোককেইজন দৈনিক হাজিৰা কৰি খোৱা লোক আৰু আনদিনৰ দৰে সেইদিনা সন্ধিয়া ছাট হাউছখনৰ পৰা চুলাই মদ ক্ৰয় কৰি সেৱন কৰিছিল।
আনহাতে, সেই সুৰা সেৱন কৰি সৰুমাই তাঁতী নামৰ এগৰাকী মহিলা গুৰুতৰভাৱে অসুস্থ হৈ চিকিৎসাধীন হৈ আছে। দুৰ্ভাগ্যজনকভাৱে কান্তা হৰিজন নামৰ লোকজনে আগদিনা মাতৃৰ মৃতদেহ সৎকাৰ কৰি ঘৰলৈ অহাৰ পিছত মদ সেৱন কৰি মৃত্যুমুখত পৰে।
উক্ত ঘটনাৰ সম্ভেদ পাই বৰপথাৰ আঞ্চলিক ছাত্ৰ সন্থাই স্থানীয় ৰাইজৰ সহযোগত বৰপথাৰ থানাৰ ভাৰপ্ৰাপ্ত বিষয়াজনক ঘটনাটো অৱগত কৰাৰ পিছত শনিবাৰে নিশাই আৰক্ষীয়ে পিন্টু পালক আটক কৰে। আৰক্ষীয়ে লগতে পিন্টু পালৰ ঘৰৰ পৰা অবৈধ চুলাই মদৰ লগতে অবৈধভাৱে মজুত ৰখা বিলাতী সুৰাৰ বটল জব্দ কৰে। আৰক্ষীয়ে পালৰ স্বীকাৰোক্তিৰ ভিত্তিত চুলাই মদ যোগান ধৰা নাৰায়ন কোঁচ নামৰ ব্যক্তি এজনকো আটক কৰিছে।
বৰপথাৰৰ বিভিন্ন স্থানত বিশেষকৈ নগৰখনৰ উপকণ্ঠ অঞ্চলত বিগত কেইমাহ মানৰ পৰা আৰক্ষীৰ জ্ঞাতসাৰেই অবৈধ মদৰ ব্যৱসায় চলি থকাৰ অভিযোগ উত্থাপিত হৈছে।
