পোন প্ৰথমবাৰৰ বাবে আন্তঃমহাবিদ্যালয় পৰ্যায়ৰ কোনো প্ৰতিযোগিতা আয়োজনৰ সুবিধা লাভ কৰা দৰং জিলাৰ মঙলদৈ মহাবিদ্যালয়ত আজিৰ পৰা আৰম্ভ হৈছে গুৱাহাটী বিশ্ববিদ্যালয় অধীনৰ আন্তঃমহাবিদ্যালয় বাস্কেটবল প্ৰতিযোগিতা। উল্লেখ্য যে প্ৰতিযোগিতাখন ল’ৰা আৰু ছোৱালী উভয় শাখাতে অনুষ্ঠিত হ’ব।
তিনিদিনীয়াকৈ অনুষ্ঠিত হ’বলগীয়া প্ৰতিযোগিতাখনৰ আজি শুভাৰম্ভণি মেচৰ ল’ৰা শাখাত ঘৰুৱা মঙলদৈ মহাবিদ্যালয়ৰ মুখা মুখী হয় হোজাই মহাবিদ্যালয়। মেচখনত ঘৰুৱা দল মঙলদৈয়ে হোজাইক ৩৫-১৮ৰ বৃহৎ ব্যৱধানত পৰাস্ত কৰি পৰৱৰ্তী ৰাউণ্ডলৈ অগ্ৰসৰ হয়।
আনহাতে ছোৱালী শাখাত মাত্ৰ দুটা দলে অংশগ্ৰহণ কৰা একমাত্ৰ মেচখনত গুৱাহাটী বিশ্ববিদ্যালয়ে ঘৰুৱা দল মঙলদৈ মহাবিদ্যালয়ক ২৫-১০ৰ ব্যৱধানত পৰাস্ত কৰি বিজয়ীৰ সন্মান লাভ কৰে।
ইফালে শুভাৰম্ভণি অনুষ্ঠানত গুৱাহাটী বিশ্ববিদ্যালয়ৰ ৰেক্টৰ অধ্যাপক এইচ পি শৰ্মা, গুৱাহাটী বিশ্ববিদ্যালয়ৰ যুৱ কল্যাণ বিভাগৰ সঞ্চালক ৰঞ্জন কাকতি, দৰং জিলাৰ আৰক্ষী অধীক্ষক শ্ৰীজিঠ টি, মঙলদৈ মহাবিদ্যালয় উন্নয়ন সমিতিৰ সভাপতি জয়ন্ত চহৰীয়াৰ লগতে মহাবিদ্যালয়খনৰ ৰাজনীতি বিজ্ঞান বিভাগৰ অৱসৰ প্ৰাপ্ত মুৰব্বী অধ্যাপক ড০ নগেন্দ্ৰ নাথ শৰ্মা উপস্থিত থাকে।
লক্ষ্যণীয় যে ব্যাপক উৎসাহ উদ্দীপনাৰে মঙলদৈ মহাবিদ্যালয়ে আয়োজন কৰা আন্তঃমহাবিদ্যালয় বাস্কেটবল প্ৰতিযোগিতাখনত অংশগ্ৰহণকাৰীৰ দলৰ সেৰেঙা উপস্থিতিৰ বাবে ক্ৰীড়াপ্ৰেমীসকল যথেষ্ট নিৰুৎসাহী হোৱা পৰিলক্ষিত হৈছে। মনকৰিবলগীয়া যে প্ৰতিযোগিতাখনত মাত্ৰ সাতটা দলে অংশগ্ৰহণ কৰা বুলি আয়োজক সমিতিয়ে জানিবলৈ দিয়ে।
