দুবছৰৰ প্ৰতীক্ষাৰ অন্তত সম্প্ৰসাৰিত হ’ল অসম মন্ত্ৰীসভা। সৰ্বানন্দ সোণোৱালৰ মন্ত্ৰীসভাত স্থান পালে সাতগৰাকী নতুন বিধায়কে। কিন্তু মন্ত্ৰীসভা সম্প্ৰসাৰণত সন্তুষ্ট নহয় একাংশ বিজেপি বিধায়ক।
জ্যেষ্ঠ বিজেপি বিধায়ক প্ৰশান্ত ফুকনে সম্প্ৰসাৰিত মন্ত্ৰীসভাত স্থান নাপাই বহু পদবীৰ পৰা পদত্যাগ কৰাৰ পাছত এইবাৰ বৰাক উপত্যকাৰ ছোনাই সমষ্টিক প্ৰতিনিধিত্ব কৰা বিজেপিৰ বিধায়ক আমিনুল হক লস্কৰেও ক্ষুভিত হৈ ৰাজ্যিক হজ সমিতিৰ পৰা পদত্যাগ কৰিছে।
উল্লেখ্য যে অসম তথা বৰাকৰ একমাত্ৰ সংখ্যালঘু বিজেপি বিধায়ক লস্কৰে সোণোৱাল মন্ত্ৰীসভাত স্থান লাভ কৰিব বুলি আশা কৰি আছিল। কিন্তু নেতৃত্বই তেওঁক মন্ত্ৰীত্ব পদৰ পৰা বঞ্চিত কৰাত এতিয়া বৰাকৰ সৰ্বত্ৰে প্ৰতিবাদ সাব্যস্ত হোৱা পৰিলক্ষিত হৈছে।
ইফালে সোণোৱাল মন্ত্ৰীসভা সম্প্ৰসাৰণ তথা সাল সলনি কাৰ্যত মুঠেও সন্তুষ্ট নহয় বিৰোধী দল কংগ্ৰেছ। সম্প্ৰসাৰিত মন্ত্ৰীসভাত বৰাক উপত্যকাটোৰ পৰা এজনো বিধায়কে মন্ত্ৰীত্ব লাভ নকৰা কাৰ্যত বৰাকৰ কংগ্ৰেছ নেতৃত্বই ক্ষুৰধাৰ সমালোচনা কৰিছে বিজেপি নেতৃত্বাধীন চৰকাৰখনক।
বৰাক উপত্যকাৰ প্ৰাক্তন কংগ্ৰেছী বিধায়ক আতাউৰ ৰহমান, জিলা সভাপতি প্ৰদীপ দে আৰু জ্যেষ্ঠ নেতা পাৰ্থৰঞ্জন চক্ৰৱৰ্তীয়ে এই প্ৰসংগত সংবাদ মাধ্যমৰ আগত নিজৰ মত প্ৰকাশ কৰি কয় যে বিজেপি নেতৃত্বাধীন কেন্দ্ৰীয় তথা ৰাজ্য চৰকাৰখনে বৰাক আৰু ব্ৰহ্মপুত্ৰৰ সম উন্নয়ন কামনা নকৰে।
কাছাৰ কংগ্ৰেছৰ নেতৃত্বই আৰু কয় যে সোণোৱাল নেতৃত্বাধীন চৰকাৰখনে চাহ বাগান সম্প্ৰদায় আৰু সংখ্যালঘু মুছলমান লোকসকলৰ উন্নয়নৰ কথা চিন্তা নকৰে সেয়ে মন্ত্ৰীসভাত মুছলমান সম্প্ৰদায়ৰ বিধায়কজন মন্ত্ৰীত্ব লাভৰ পৰা বঞ্চিত হয়।
এইখন চৰকাৰৰ দিনত বৰাকৰ পৰা মাত্ৰ এজনেহে মন্ত্ৰীত্ব লাভ কৰাৰ বিপৰীতে বিগত কংগ্ৰেছ চৰকাৰৰ দিনত বৰাক উপত্যকাৰ পৰা বহু কেইজন বিধায়কে মন্ত্ৰীত্ব লাভ কৰিছিল বুলিও উল্লেখ কৰে।
