মহকুমা ঘোষণা হোৱাৰ কেইবা বছৰৰ পিছত আজি মহকুমা প্ৰশাসন আৰু স্থানীয় লোকৰ সহযোগত আনুষ্ঠানিক ভাৱে বোকাখাতত মহকুমা পুথিভঁৰালৰ দ্বাৰ উন্মোচন কৰা হয় ৷ বোকাখাতৰ নাট্য মন্দিৰৰ এটা বাৰ্তানুকুল কোঠাত অস্থায়ীভাৱে আৰম্ভ কৰা হৈছে বোকাখাতৰ মহকুমা পুথিভঁৰাল ৷
এই উপলক্ষে বোকাখাত নাট্যমন্দিৰত অনুষ্ঠিত এক উদ্বোধনী অনুষ্ঠানত বোকাখাতৰ মহকুমাধিপতি বিবেক শ্যাম, সাহিত্যিক পেঞ্চনাৰ অন্নদা শইকীয়া, আপকুৰ উপদেষ্টা ভৱেশ শইকীয়া, নাট্যমন্দিৰৰ সভাপতি গোলাপ কলিতা, পুৱতি সাহিত্য সভাৰ সভাপতি কল্পনা চেতিয়া, সাহিত্য সভাৰ কাৰ্যকৰী সদস্য হেমেন হাজৰিকা, মহুৰাৰ সাহিত্যক মহেন শইকীয়া, জে ডি এছ জি মহাবিদ্যালয়ৰ অধ্যক্ষ ডঃ জয়ন্ত গগৈ আৰু চি এন বি মহাবিদ্যালয়ৰ অধ্যক্ষ শৰৎ দত্তৰ লগতে বোকাখাতৰ জ্যেষ্ঠ ব্যক্তিসকল উপস্থিত থাকে ৷
অনুষ্ঠানত মহকুমা পুথি ভঁৰালৰ ফিটা কাটি দ্বাৰ উন্মোচন কৰে বোকাখাতৰ মহকুমাধিপতি বিবেক শ্যাম আৰু বন্তি প্ৰজ্বলন কৰে জ্যেষ্ঠ সাংবাদিক ভৱেশ শইকীয়াই ৷ সদৌ অসম সাংবাদিক সন্থাৰ সভাপতি জিতু শৰ্মা ৰাজখোৱাই আঁত ধৰা অনুষ্ঠানৰ উদ্দেশ্য বাখ্যা কৰে মহকুমা তথ্য আৰু জনসংযোগ বিষয়া মামুন বৰকটকীয়ে ৷
অনুষ্ঠানটোত বোকাখাতৰ বহু লোকে বোকাখাত মহকুমা পুথিভঁৰাললৈ কিতাপৰ লগতে আচবাব আৰু কিতাপ থোৱা আলমীৰা আগবঢ়ায় ৷
অনুষ্ঠানতে মহকুমাধিপতি বিবেক শ্যামে মহকুমা পুথিভঁৰালৰ বাবে ভূমি প্ৰদানৰ বাবেও আশ্বাস প্ৰদান কৰে ৷
ৰাইজৰ প্ৰচেষ্টাৰে এই পুথিভঁৰালৰ আৰম্ভণী হৈছে যদিও বোকাখাতৰ জনসাধাৰণে অচিৰেই বোকাখাতৰ এই মহকুমা পুথিভঁৰালক চৰকাৰী স্বীকৃতি প্ৰদান কৰি এজন গ্ৰন্থাগাৰিক নিযুক্তি দিবৰ বাবে দাবী জনায় ৷
