মেঘালয়ত কনৰাড চাংমা নেতৃত্বধীন এমডিএ চৰকাৰখনে শপত গ্ৰহণ কৰাৰ তিনিদিনৰ ভিতৰতে নিযুক্তি দিছে ১২গৰাকীকৈ সচিবক।
ইতিমধ্যে নৱনিযুক্ত মুখ্যমন্ত্ৰী চাংমাই ৰাজ্যখনৰ মুখ্য সচিবক এই নিযুক্তি প্ৰক্ৰিয়া আগবঢ়াই নিয়াৰ বাবে যাৱতীয়া ব্যৱস্থা গ্ৰহণৰ নিৰ্দেশ দিছে।
সংবাদ প্ৰতিষ্ঠানে প্ৰকাশ কৰা বাতৰি অনুসৰি বিজেপি বিধায়ক এছ ছুল্লেইক মেঘালয় পৰ্যটন নিগম উন্নয়ন লিমিটেড, পিডিপি বিধায়ক জেছন ছৌকমি মাওলঙক মেঘালয় চৰকাৰ নিৰ্মাণ কোম্পানী, পিডিএফৰ বিধায়ক জি মাইলিয়েমক খাদী বোৰ্ড, এনপিপিৰ ডি লামাৰেক মেঘালয় নগৰ উন্নয়ন প্ৰাধিকাৰী বিভাগৰ সচিব ৰূপে নিযুক্তি দিয়া হৈছে।
তদুপৰি আন কেইবাগৰাকীও জনপ্ৰতিনিধিক বিভিন্ন বিভাগৰ সচিব ৰূপে নিযুক্তি দিছে চাংমা নেতৃত্তাধীন চৰকাৰখনে।
উল্লেখ্য যে লোকসভাৰ প্ৰাক্তন অধ্যক্ষ প্ৰয়াত পি এ চাংমাৰ পুত্ৰ কনৰাড চাংমা নেতৃত্বাধীন মৰ্চা চৰকাৰখনে যোৱা মঙলবাৰে শ্বিলঙত শপতগ্ৰহণ কৰিছিল।
তাৰ ৭২ ঘণ্টাৰ পাছতে কনৰাড চাংমাই ৰাজ্যখনত ১২গৰাকীকৈ সচিব নিযুক্তি দিবলগীয়াটো কেইবাটাও দিশৰ পৰা যথেষ্ট তাৎপৰ্যপূৰ্ণ বুলি প্ৰকাশ কৰিছে ৰাজনৈতিক বিশ্লেষকসকলে।
প্ৰসংগক্ৰমে উল্লেখযোগ্য যে পাহাৰীয়া ৰাজ্যখনত কংগ্ৰেছে একক সংখ্যাগৰিষ্ঠ দল হিচাপে নিৰ্বাচনত জয় লাভ কৰা সত্ত্বেও বিজেপিৰ দুগৰাকী আৰু আন নিৰ্দলীয় বিধায়কৰ সমৰ্থনত কনৰাড চাংমা নেতৃত্বধীন এনপিপিয়ে চৰকাৰ গঠন কৰিবলৈ সক্ষম হৈছিল।
