ৰেইল বিভাগে পুৰণি শৰাইঘাটৰ দলং মেৰামতিৰ বাবে আজি ৰাতিপুৱা ১০.৩০ বজাৰ পৰা দুপৰীয়া ১.৩০ বজালৈ দলঙখনেৰে যাতায়াত বন্ধ ৰখাৰ সিদ্ধান্ত লৈছে। ৰেইল বিভাগৰ জনসম্পৰ্কৰক্ষী বিষয়া নৃপেন ভট্টাচাৰ্যই এই সম্পৰ্কত জনোৱা অনুসৰি দলঙখনৰ বিয়াৰিং মেৰামতিৰ বাবে তিনি ঘন্টা সময় ৰেইল আৰু যান-বাহনৰ চলাচল বন্ধ ৰখাৰ সিদ্ধান্ত গ্ৰহণ কৰিছে।
দলঙখনৰ মেৰামতিৰ সময়ছোৱাত গুৱাহাটীত প্ৰৱেশ কৰিবলগীয়া সকলো উজনিমুৱা ৰে’ল ৰঙিয়া, চাংসাৰী, বাইহাটা আদি স্থানত ৰখোৱা হ’ব বুলি আমাৰ আগত জনায়। আনহাতে গুৱাহাটীৰ পৰা উক্ত সময়ছোৱাত যাত্ৰা কৰিবলগীয়া নামনিমুৱা ৰেইল সমূহৰ সময়ৰ কিছু সাল-সলনি কৰা হ’ব বুলিও কয়।
স্মৰ্তব্য যে পুৰণি শৰাইঘাট দলঙেৰে যাতায়াত বন্ধ থকা সময়ছোৱাত নতুন দলঙখনেৰে দুয়ো দিশৰ পৰা বাহনৰ অহা-যোৱা চলি থাকিব। ভোগালী বিহু তথা উৰুকাৰ প্ৰাকক্ষণত ৰেইলৱে বিভাগে দলং মেৰামতিৰ সিদ্ধান্ত গ্ৰহণ কৰা কাৰ্যত সৰ্বত্ৰ প্ৰতিক্ৰিয়াৰ সৃষ্টি হৈছে। উল্লেখ্য যে বিগত বৰ্ষৰ উৰুকাতো শৰাইঘাট দলঙত সৃষ্টি হোৱা তীব্ৰ যান-জঁটৰ ফলত ঘৰলৈ যাত্ৰা কৰা যাত্ৰীসকল হাৰাশাস্তি ভোগ কৰাৰ উপৰি গৰ্ভৱতী মহিলা এগৰাকী মৃত্যুমুখত পৰাও পৰিলক্ষিত হৈছিল।
