অসমৰ আগশাৰীৰ উচ্চ শিক্ষাৰ অনুষ্ঠানসমূহৰ অন্যতম প্রতিষ্ঠান গিৰিজানন্দ চৌধুৰী ইনষ্টিটিউট অব মেনেজমেণ্ট এণ্ড টেকন’লজি আৰু একে চৌহদতে থকা গিৰিজানন্দ চৌধুৰী ইনষ্টিটিউট অব ফাৰ্মাচিউটিকেল ছায়েন্সে প্ৰতিবছৰে পতাৰ দৰে এইবাৰো ইয়াৰ বছৰেকীয়া সাংস্কৃতিক আৰু কাৰিকৰী উৎসৱ EUPHUISM অনুষ্ঠিত কৰিবলৈ ওলাইছে।
এটা উচ্চ শিক্ষাৰ প্ৰতিষ্ঠানৰ বাৰ্ষিক কাৰ্য্যসূচী হ’লেও ‘EUPHUISM’ হৈছে এনে এখন মঞ্চ, য’ৰ পৰা একোটা সুন্দৰ মনৰ জৰিয়তে সৃষ্টিশীলতাৰ সন্ধান কৰিব পাৰি।
এই বার্ষিক ক্রীড়া আৰু সাংস্কৃতিক উৎসৱৰ জৰিয়তে প্ৰতিষ্ঠান দুটাই অসমত এক সামাজিক আৰু সাংস্কৃতিক সমন্বয়ৰ ভেটি গঢ়িবলৈ প্রচেষ্টা চলাই আহিছে।
চলিত বর্ষৰ EUPHUISM উৎসৱটো অহা ১৪ ফেব্রুৱাৰিৰ পৰা আৰম্ভ হ’ব। ইয়াৰ মূল বক্তব্য হ’ল Eunoia- The way to a beautiful world.
আয়োজকৰ সূত্ৰই কয় যে এখন সৰ্বাংগসুন্দৰ পৃথিৱী গঢ়াই হ’ল মানুহৰ মহানতম কৰ্ম আৰু এই সুন্দৰ পৃথিৱীখন গঢ় লৈ উঠিব একোটা সুন্দৰ মনৰ পৰা। ইয়াৰ বাবে দৰকাৰ হয় ধ্বংসমুখী কৰ্মৰাজিক বশ কৰি সত্য আৰু সুন্দৰৰ প্রসাৰ কৰিব পৰা এক গভীৰ চিন্তাৰাজিৰ।
১৪ ফেব্রুৱাৰিৰ পৰা ১৬ ফেব্রুৱাৰিলৈ হ’ব লগীয়া সাংস্কৃতিক অনুষ্ঠানসমূহেও অসমৰ ভিন্ন প্রান্তৰ মহাবিদ্যালয়, বিশ্ববিদ্যালয়ৰ ছাত্র-ছাত্রীক একত্রিত কৰি সাংস্কৃতিক একাত্মতাবোধৰ জৰিয়তে প্রগতিৰ বার্তা বহন কৰিবলৈ আহ্বান জনাব বুলি আয়োজকে মন্তব্য কৰে।
আয়োজকে কয় যে বাৰেবৰণীয়া এই সাংস্কৃতিক অনুষ্ঠানত ‘EUPHUISM’-এ অসমৰ ছাত্র-ছাত্রী সকলক প্রতিভা বিকাশৰ এখন মঞ্চ দি আহিছে। লগতে আন্তঃমহাবিদ্যালয়ৰ কিছুমান কাৰিকৰী প্রতিযোগিতায়ো ‘EUPHUISM’-ৰ সৌষ্ঠৱ বৃদ্ধি কৰিব।
১৬ ফেব্রুৱাৰি অর্থাৎ শেষ নিশাৰ মুখ্য আকর্ষণ বহু জনপ্রিয় গীতেৰে দেশ তথা বিশ্বৰ শ্রোতাক মুগ্ধ কৰিবলৈ সক্ষম হোৱা বলিউদৰ অতিকৈ চিনাকি শিল্পী ‘সিদ্ধাৰ্থ মহাদেৱন’।
উল্লেখযোগ্য যে ২০০৬ আৰু ২০০৭ চনৰ পৰা নিৰৱচ্ছিন্নভাৱে অসম তথা উত্তৰ-পূর্বাঞ্চলৰ মানৱ সম্পদ উন্নয়নৰ ক্ষেত্রত গিৰিজানন্দ চৌধুৰী ইনষ্টিটিউট অব মেনেজমেন্ট এণ্ড টেকন’লজি আৰু গিৰিজানন্দ চৌধুৰী ইনষ্টিটিউট অব ফাৰ্মাচিউটিকেল ছায়েন্সে ডাঙৰ বৰঙনি যোগাই আহিছে।
শিক্ষাৰ ক্ষেত্রত সেৱা আগ বঢ়োৱাৰ বাদেও প্রতিষ্ঠান দুটাই বিগত সময়ছোৱাত সামাজিক প্রগতিত বাধাৰ প্রাচীৰ সৃষ্টি কৰিব পৰা কাৰক কিছুমানক চিনাক্ত কৰি সেই বিষয়বোৰত অভ্যন্তৰীণ অধ্যয়ন চলাই সমস্যাসমূহ লাঘৱ কৰিবলৈ যৎপৰোনাস্তি চেষ্টা চলাই আহিছে। বাটৰ নাট, বৃক্ষৰোপণ, ৰক্তদানৰ সজাগতা শিবিৰ, দুখীয়াৰ বাবে বিনামূলীয়া স্বাস্থ্য শিবিৰ, স্বচ্ছ ভাৰতৰ সজাগতাৰ বাবে এনড্ৰইড ম’বাইল এপ নিৰ্মাণ আদি বিভিন্ন পদক্ষেপ লোৱাৰ বাদেও শেহতীয়াকৈ ‘গড়ভঙা’ৰ দৰে কামৰূপ মহানগৰ এখন অতিকৈ পিছপৰা গাৱঁক ম’ডেল গাৱঁলৈ উন্নীত কৰিবৰ বাবে প্রকল্প হাতত লৈছে।
আয়োজকে ১৪ ফেব্রুৱাৰিৰ পৰা ১৬ ফেব্রুৱাৰিলৈকে হ’ব লগীয়া সমন্বয় আৰু প্রগতিৰ এই অনুষ্ঠান ‘EUPHUISM’-লৈ সমগ্র অসমবাসীকে আমন্ত্রণ জনাইছে। ‘EUPHUISM’ বিষয়ে বিতংকৈ জানিব বাবে অফিচিয়েল ৱেবছাইটত http://gimt-euphuism.org/ চাব পাৰিব। এই কথা জনাইছে আয়োজক সমিতিৰ হৈ ছাত্ৰ আহ্বায়ক ভৰত কলিতাই।
