অৰুণাচল প্ৰদেশৰ ৱুশ্বু খেলুৱৈ পায়া টাকুৱে ২০১৮ৰ আন্তৰ্জাতিক ৱুশ্বু প্ৰতিযোগিতাত ভাৰতক প্ৰতিনিধিত্ব কৰিবলৈ সাজু হৈ উঠিছে।
১৭ ফেব্ৰুৱাৰিৰ পৰা ২১ ফেব্ৰুৱাৰিলৈকে ৰাছিয়াৰ মস্কোত আন্তৰ্জাতিক প্ৰতিযোগিতাখন চলিব।
পায়া টাকুৱে ইতিমধ্যে ভাৰতীয় দলটোৰ সৈতে ১৬ ফেব্ৰুৱাৰীত মস্কোলৈ বুলি ৰাওনা হৈছে।তেওঁ ৪৮ কেজিৰ তলৰ জুনিয়ৰ মহিলা শাখাত অংশ গ্ৰহণ কৰিব।
পায়া ছাংগে লাহডেন ক্ৰীড়া একাডেমীৰ এগৰাকী নিয়মীয়া প্ৰশিক্ষাৰ্থী আৰু ক্ৰীড়া বিভাগৰ এম প্ৰেমচন্দ্ৰৰ অধীনত প্ৰশিক্ষণ গ্ৰহণ কৰি আছে।
টাকুৱে লগতে যোৱা ১৫ জানুৱাৰীৰ পৰা মণিপুৰৰ ইম্ফলত থকা ভাৰতীয় ক্ৰীড়া প্ৰাধিকৰণৰ কেন্দ্ৰত এমাহৰ বিশেষ প্ৰশিক্ষণ গ্ৰহণ কৰিছিল।
পাহাৰীয়া ৰাজ্যখনৰ এই উদিয়মান খেলুৱৈগৰাকীয়ে আন্তৰ্জাতিক প্ৰতিযোগিতাখনত বিজয়ী হৈ দেশখনৰ লগতে অৰুণাচল প্ৰদেশলৈও সন্মান কঢ়িয়াই আনিব বুলি আশা কৰিছে ক্ৰীড়া অনুৰাগীসকলে।
