৪ এপ্ৰিলত দিনৰ ১২ বজাত দিছপুৰ চৰকাৰী নিম্ন বুনিয়াদী বিদ্যালয়ত সদৌ অসম কৰ্মচাৰী পৰিষদৰ কৰ্ণধাৰ সমিতিৰ সভা এখন অনুষ্ঠিত হ’ব বুলি পৰিষদৰ সভাপতি বাসৱ চন্দ্ৰ কলিতা আৰু সম্পাদক প্ৰধান ফকৰ উদ্দিন আহমেদে এক বিবৃতিযোগে প্ৰকাশ কৰিছে।
উল্লেখযোগ্য যে সভাখনত দৰমহা আসোঁৱাহ সমিতিৰ প্ৰতিবেদন চৰকাৰৰ ওচৰত দাখিল কৰা, দুই মাহ পাৰ হোৱাৰ পিছতো ৰাজহুৱা নকৰা বিষয়, সংশোধিত দৰমহা ১ জানুৱাৰী, ২০১৬ তাৰিখৰ পৰা কাৰ্যকৰী কৰা, বিনামূলীয়া চিকিৎসা সেৱা আঁচনি কাৰ্যকৰী কৰা আদি বিষয় আলোচনা কৰা হ’ব।
তাৰোপৰি শিক্ষকসকলৰ দৰমহা ক্ষেত্ৰত থকা বিভ্ৰান্তি দূৰ কৰা, ন্যায়ালয়ৰ নিৰ্দেশনাৰ পাছতো মাষ্টাৰৰোল, কেজুৱেল, ফিক্সড-পে’ কৰ্মচাৰীসকলৰ মজুৰি তথা অন্যান্য সা-সুবিধা প্ৰদান কৰাৰ ক্ষেত্ৰত অযথা বিলম্ব কৰা, ২% মৰগীয়া বানচ চৰকাৰে আদায় দিয়া, কাৰ্যালয় সময় সালসলনি কৰা আদি বিষয়বোৰ আলোচনা কৰি পৰৱৰ্তী কাৰ্যব্যৱস্থা নিৰ্ধাৰণ কৰা হ’ব বুলি সভাপতি-সম্পাদকে জানিবলৈ দিছে।
