অসমৰ ক্ৰীড়া প্ৰেমীৰ বাবে আন এক সু-খবৰ। এইবাৰ এই সু-খবৰ আহিছে টেনিছ খেল জগতৰ পৰা। ভাৰতীয় ১৪ বছৰ অনূৰ্ধ্ব টেনিছ দলত স্থান লাভ কৰিছে অসমৰ উদীয়মান খেলুৱৈ কৃষ্টি বড়ো আৰু উদিত গগৈয়ে।
অহা ২৬ মেৰ পৰা ৭ এপ্ৰিললৈকে হ’ব লগা এছিয়া-ওছেনিয়া বিশ্ব জুনিয়ৰ টেনিছ প্ৰতিযোগিতাৰ কোৱালিফায়িং ৰাউণ্ডত অসমৰ এই দুই প্ৰতিভাৱান খেলুৱৈয়ে প্ৰতিনিধিত্ব কৰিব ভাৰতক।
উল্লেখণীয় যে পোন প্ৰথমবাৰৰ বাবে ল’ৰা আৰু ছোৱালী উভয় শাখাতে ভাৰতীয় দলত স্থান লাভ কৰিছে কোনো অসমীয়া খেলুৱৈ।
দিল্লীৰ ইয়েল্ল বল টেনিছ একাডেমীত প্ৰশিক্ষণ গ্ৰহণ কৰি থকা উদিত হ’ল দেশৰ ১৪ বছৰ অনুৰ্ধ্ব ল’ৰা শাখাৰ শীৰ্ষ বাচনিৰ খেলুৱৈ। এই সুযোগ লাভ কৰাৰ পূৰ্বেও উদিতে ভাৰতক প্ৰতিনিধিত্ব কৰিছে। আনহাতে দিছপুৰৰ নৰ্থ-ইষ্ট টেনিছ একাডেমীত প্ৰশিক্ষণ গ্ৰহণ কৰি থকা কৃষ্টিয়ে প্ৰথমবাৰৰ বাবে ভাৰতীয় দলত স্থান লাভ কৰিবলৈ সক্ষম হয়।
মনকৰিবলগীয়া যে দেশৰ ১৪ বছৰ অনুৰ্ধ্বৰ ছোৱালীৰ চতুৰ্থ বাচনিৰ খেলুৱৈ কৃষ্টিয়ে যোৱা ৬ বছৰ ধৰি মুখ্য প্ৰশিক্ষক শিৱ কুমাৰ প্ৰজাপতিৰ অধীনত প্ৰশিক্ষণ গ্ৰহণ কৰি আহিছে।
সদৌ অসম টেনিছ সন্থাই অনিৰ্বাণ বৰুৱা আৰু পল ডেলৰ অধীনত আয়োজন কৰা বিভিন্ন টেনিছ ডেভেলপমেণ্ট কাৰ্যসূচীৰ বাবেই আজি অসমৰ দুই খেলুৱৈয়ে ভাৰতীয় দলক প্ৰতিনিধিত্ব কৰাৰ সুযোগ লাভ কৰা বুলি বিভিন্ন প্ৰাক্তন টেনিছ খেলুৱৈয়ে মত ব্যক্ত কৰিছে।
টেনিছ খেলুৱৈ দুগৰাকীৰ সাফল্যত অসম টেনিছ সন্থাৰ লগতে ৰাজ্যৰ টেনিছ প্ৰেমীসকল যথেষ্ট উৎফুল্লিত হোৱা পৰিলক্ষিত হয়।
