অৰুণাচল বিধানসভাৰ দুটা সমষ্টি পূব কামেং জিলাৰ পাক্কে-কেছ্ছা আৰু নামনি ছিয়াঙৰ লিকাবালিৰ উপ নিৰ্বাচনৰ বাবে আজি ৰাতিপুৱা ৭ বজাৰ পৰাই ভোটগ্ৰহণ প্ৰক্ৰিয়া আৰম্ভ হৈছে। আবেলি ৪ বজাত ভোটগ্ৰহণ প্ৰক্ৰিয়া সমাপ্ত হ’ব।
আজি ৰাতিপুৱাই ভোটকেন্দ্ৰসমূহত ইভিএম আৰু ভোটাৰ-ভেৰিফাইড পেপাৰ অডিট ট্ৰায়েল (ভিভিপিএটি) ব্যৱস্থা সংলগ্ন কৰা হৈছে। প্ৰথমবাৰৰ বাবে ৰাজ্যখনত এই ভিভিপিএটি ব্যৱস্থা ব্যৱহাৰ কৰা হৈছে।
সমষ্টি দুটাৰ উপ নিৰ্বাচনৰ বাবে ৰাজ্যিক আৰক্ষী, আইটিবিটি আৰু চাৰিটা কেন্দ্ৰীয় অৰ্দ্ধসামৰিক বাহিনীৰ লোকক নিৰাপত্তাৰ কামত নিয়োগ কৰা হৈছে। স্পৰ্শকাতৰ কেন্দ্ৰসমূহত নিৰাপত্তাৰ দিশটো চোৱা চিতা কৰিব চিআৰপিএফ আৰু আইআৰবিএ।
দিয়োটা সমষ্টিৰ ভোটগ্ৰহণৰ বাবে মুঠতে ৩৭০ গৰাকী বিষয়াক নিয়োগ কৰা হৈছে। গোটেই নিৰ্বাচনী প্ৰক্ৰিয়াটোৰ সাধাৰণ তথা খৰচৰ পৰ্যবেক্ষণৰ বাবে নিৰ্বাচন আয়োগে পৰ্যবেক্ষক নিযুক্তি দিছে।
অহা ২৪ তাৰিখে হ’বলগা ভোটগননাৰ বাবে দুয়োখন জিলাতে হল সাজু কৰি ৰখা হৈছে।
পাক্কে-কেছ্ছাং সমষ্টিৰ ২৯ টা ভোটগ্ৰহণ কেন্দ্ৰত ৩৯৪৩ গৰাকী মহিলাকে ধৰি সৰ্বমুঠ ৭,৪৫৫ গৰাকী ভোটাৰে ভোটদান সাব্যস্ত কৰিব। আনহাতে, লিকাবালি সমষ্টিত ৩৯টা ভোটগ্ৰহণ কেন্দ্ৰত ৫৩৩১ গৰাকী মহিলাকে ধৰি ১০,৬০৮ গৰাকী ভোটাৰে ভোটাধিকাৰ সাব্যস্ত কৰিব।
পাক্কে-কেছ্ছাং সমষ্টিত কংগ্ৰেছৰ প্ৰাৰ্থী প্ৰাক্তন উপ মুখ্যমন্ত্ৰী কামেং ডলো আৰু বিজেপি প্ৰাৰ্থী বি আৰ ৱাঘেৰ মাজত পোনপটীয়া প্ৰতিদ্বন্দিতা হোৱাৰ বিপৰীতে লিকাবালি সমষ্টিত প্ৰতিদ্বন্দিতা কৰা চাৰি গৰাকী প্ৰতিদ্বন্দ্বীৰ মাজতে প্ৰতিদ্বন্দিতা চলিব। লিকাবালি সমষ্টিৰ প্ৰাৰ্থী কেইগৰাকী হৈছে ক্ৰমে কাৰ্ডো নেইগাৰ (বিজেপি), মডাম ডিনি (কংগ্ৰেছ), পিপুলছ পাৰ্টি অফ অৰুণাচলৰ গুমকে ৰিবা আৰু নিৰ্দলীয় প্ৰাৰ্থী ছেংগো টাইপডিয়া।
চলিত বছৰৰে যোৱা ৪ ছেপ্টেম্বৰত ৰাজ্যৰ স্বাস্থ্য আৰু পৰিয়াল কল্যাণ বিভাগৰ মন্ত্ৰী জম্বে কেনাৰ মৃত্যুৰ পিছত লিকাবালি আসনখন খালী হৈছিল। আনহাতে প্ৰাক্তন মন্ত্ৰী তথা বিজেপি প্ৰাৰ্থী আটুম ওৱেলীয়ে ২০১৪ ৰ নিৰ্বাচনত ডলোৰ বিজয়ক প্ৰত্যাহ্বান জনাই দাখিল কৰা এখন নিৰআচনী আবেদনৰ ৰায় দি গুৱাহাটী উচ্চ ন্যায়ালয়ে ডলোৰ বিধায়ক পদ খাৰিজ কৰাৰ পাছত পাক্কে কেছ্ছাং আসনখন খালী হৈছিল।
