উচ্চতম ন্যায়ালয়ৰ জ্যেষ্ঠ বিচাৰপতি ন্যায়াধীশ জাষ্টি চেলামেশ্বৰে সৰ্বোচ্চ আদালখনত প্ৰায় সাত বছৰীয়া কাৰ্যকাল সমাপ্ত কৰি শুকুৰবাৰে অৱসৰ গ্ৰহণ কৰিব। ৰাষ্ট্ৰীয় বাতৰি কাকত টাইমছ অৱ ইণ্ডিয়াই এই বাতৰি প্ৰকাশ কৰিছে।
ন্যায়াধীশ চেলামেশ্বৰে গুৱাহাটী উচ্চ ন্যায়ালয়তো সেৱা আগবঢ়াইছিল। ২০০৭ চনৰ ৩ মে’ত তেওঁ গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে কাৰ্যভাৰ গ্ৰহণ কৰিছিল।
ন্যায়াধীশ চেলামেশ্বৰে চলিত বছৰৰ জানুৱাৰীত তেওঁৰ তিনিগৰাকী সতীৰ্থ ন্যায়াধীশ ৰঞ্জন গগৈ, এম বি লকুৰ আৰু কুৰিয়ান যোচেফৰ সৈতে লগ লাগি ভাৰতৰ মুখ্য ন্যায়াধীশ দীপক মিশ্ৰৰ বিৰুদ্ধে মুকলিকৈ বিদ্ৰোহ কৰি ইতিহাস সৃষ্টি কৰিছিল।
পৰম্পৰা ভংগ কৰি চাৰিওগৰাকী ন্যায়াধীশে এখন সংবাদমেল পাতি 2014 চনর 1 ডিচেম্বৰত মৃত্যু হোৱা চিবিআইৰ বিশেষ ন্যায়াধীশ বি এইচ লয়াৰ স্পৰ্শকাতৰ গোচৰটোৰ লগতে গোচৰসমূহৰ ‘নিৰ্বাচিত’ আৱন্টনৰ বিষয়ত প্ৰশ্ন উত্থাপন কৰিছিল।
আজি ৬৫ বছৰত ভৰি দিয়া ন্যায়াধীশ চেলামেশ্বৰ ব্যক্তিগত গোপনীয়তাৰ অধিকাৰক মৌলিক অধিকাৰ হিচাপে ঐতিহাসিক ৰায় প্ৰদান কৰা ৯ জনীয়া বিচাৰপীঠৰো সদস্য আছিল।
তেওঁ লগতে আধাৰৰ বিৰুদ্ধে আবেদনসমূহ পৰীক্ষা কৰাৰ বাবে গঠিত তিনিজনীয়া খণ্ডপীঠৰ মুৰব্বী আছিল যিয়ে এই আবেদনসমূহ পূৰ্ণ বিচাৰপীঠলৈ প্ৰেৰণ কৰি স্পষ্ট কৰিছিল যে ১২ সংখ্যাৰ ৰাষ্ট্ৰীয় একক পৰিচয় নম্বৰৰ বাবে কোনো ব্যক্তিয়ে সামাজিক সুবিধা লাভৰ পৰা বঞ্চিত হ’ব নালাগে।
উল্লেখযোগ্য যে ন্যায়াধীশ চেলামেশ্বৰে উচ্চতম ন্যায়ালয় বাৰ এছোচিয়েশ্যন বিদায় অনুষ্ঠানৰ আমন্ত্ৰণ প্ৰত্যাখ্যান কৰিছে।
অৱশ্যে তেওঁ উচ্চতম ন্যায়ালয়ৰ গ্ৰীষ্মকালীন বন্ধ হোৱাৰ আগেয়ে তেওঁৰ অন্তিমটো কৰ্মদিন যোৱা ১৮ মে’ত ভাৰতৰ মুখ্য ন্যায়াধীশৰ সৈতে বিচাৰপীঠত বহাৰ পৰম্পৰা অনুসৰণ কৰিছিল।
