ডিব্ৰুগড় বিশ্ববিদ্যালয়ত অনুষ্ঠিত হোৱা আন্তঃবিশ্ববিদ্যালয় মহিলা টেবুল টেনিছ প্ৰতিযোগিতাখনৰ আজি সফল সামৰণি পৰে। প্ৰতিযোগিতাখনৰ ফাইনেলত মখামুখি হয় ওছমানিয়া বিশ্ববিদ্যালয় আৰু মাদ্ৰাছ বিশ্ববিদ্যালয়ৰ মাজত। ওছমানিয়া বিশ্ববিদ্যালয়ে ৩-০ ব্যৱধানত মাদ্ৰাছ বিশ্ববিদ্যালয়ক পৰাজিত কৰি শ্ৰেষ্ঠত্ব প্ৰতিপন্ন কৰে।
উল্লেখ্য যে প্ৰতিযোগিতাখনত ওছমানিয়া বিশ্ববিদ্যালয়ে প্ৰথম স্থান দখল কৰাৰ বিপৰীতে দ্বিতীয় স্থান অধিকাৰ কৰে মাদ্ৰাছ বিশ্ববিদ্যালয়ে আৰু তৃতীয় স্থানত থাকে এছ আৰ এম বিশ্ববিদ্যালয়।
ডিব্ৰুগড় বিশ্ববিদ্যালয় ক্ৰীড়া ব’ৰ্ডে আয়োজন কৰা আন্তঃবিশ্ববিদ্যালয় মহিলা টেবুল টেনিছ প্ৰতিযোগিতাখন যোৱা ২৫ ফেব্ৰুৱাৰিৰ পৰা ডিব্ৰুগড় বিশ্ববিদ্যালয়ত অনুষ্ঠিত হৈছিল।
মন কৰিবলগীয়া যে দেশৰ চাৰিটা মণ্ডলৰ সৰ্বমুঠ ১৬ খন বিশ্ববিদ্যালয়ে এই প্ৰতিযোগিতাখনত অংশগ্ৰহণ কৰিছিল।
‘আমাৰ বিশ্ববিদ্যালয়ৰ ছাত্ৰীসকলে বিশ্ববিদ্যালয়খনলৈ গৌৰৱ কঢ়িয়াই অনাৰ বাবে আমি অত্যন্ত সুখী। সুদীৰ্ঘ ২৫ বছৰৰ মূৰত টেলেংগনা ৰাজ্যৰ ওছমানিয়া বিশ্ববিদ্যালয়ে আন্তঃবিশ্ববিদ্যালয় মহিলা টেবুল টেনিছ প্ৰতিযোগিতাত প্ৰথম স্থান দখল কৰিবলৈ সক্ষম হৈছে’, ওছমানিয়া বিশ্ববিদ্যালয়ৰ দলীয় মেনেজাৰ ড০ কে শ্ৰীধৰ ৰেড্ডীয়ে সংবাদ মাধ্যমৰ আগত এনেদৰে মন্তব্য কৰে।
