নির্বাচনী শপতনামাত সম্পত্তিৰ তথ্য লুকুৱাই এক আকস্মিক আৰু ভয়াৱহ দুৰ্যোগৰ সন্মুখীন হৈছে বিটিচিৰ মুখ্য কার্যবাহী সদস্য প্রমোদ বড়ো। পত্নী পাৰুল ভৰালী বড়োৰ নামত ৯ টা স্থানত থকা ভূ-সম্পত্তিৰ তথ্যই জোকাৰণি তুলিছে বিটিআৰৰ ৰাজনীতিত।
নির্বাচনী শপতনামাত এই ভূ-সম্পত্তিৰ তথ্য লুকুওৱাৰ বাবে জনপ্রতিনিধি আইন, ১৯৫১ ৰ অধীনত প্রমোদ বড়োৰ মনোনয়ন পত্ৰ খাৰিজ কৰাৰ দাবী উত্থান কৰিছে ৰাইজৰ দলৰ সভাপতি অখিল গগৈয়ে।
উল্লেখ্য যে বিটিচিৰ মুখ্য কার্যবাহী সদস্য প্রমোদ বড়োৱে নির্বাচনী শপতনামাত ভূ-সম্পত্তিৰ তথ্য গাপ দিয়াৰ চাঞ্চল্যকৰ এক তথ্য শেহতীয়াকৈ প্রকাশ পাইছে। নিয়ম অনুসৰি নিৰ্বাচনী শপতনামাত প্রার্থীয়ে নিজৰ আৰু পৰিয়ালৰ নামত থকা সকলো স্থাৱৰ আৰু অস্থাৱৰ সম্পত্তিৰ তথ্য দাখিল কৰিব লাগে। কিন্তু প্রাপ্ত তথ্য অনুসৰি বড়োলেও টেৰিট’ৰিয়েল কাউন্সিলৰ এইবাৰৰ নিৰ্বাচনত ২৮ নং গয়বাৰী সমষ্টিৰ পৰা প্ৰতিদ্বন্দ্বিতা কৰা মুখ্য কার্যবাহী সদস্য প্রমোদ বড়োৱে পত্নীৰ নামত থকা কেইবাটাও ভূ-সম্পত্তিৰ তথ্য গোপন কৰিছে।
প্রমোদ বড়োৱে তেওঁৰ নিৰ্বাচনী শপতনামাত পত্নী পারুল ভৰালী বড়োৰ নামত মুঠ ৩ বিঘা ১০ লেচা কৃষি ভূমি থকাৰ তথ্য সদৰী কৰিছে। এই আটাইখিনি ভূমি আছে ৰঙিয়া ৰাজহ চক্ৰৰ অন্তৰ্গত কছাৰী শ’লমাৰী গাঁৱত। কিন্তু প্রমোদ বড়োৱে তেওঁৰ পত্নীৰ নামত থকা কমেও আন ৯ টা স্থানৰ ভূ-সম্পত্তিৰ ঠিকনা শপতনামাত উল্লেখ কৰা নাই।
নির্বাচনী শপতনামাত প্রমোদ বড়োৱে তেওঁৰ পত্নীৰ নামত যিসমূহ ভূ-সম্পত্তিৰ তথ্য সদৰি কৰিছে, তাৰ বিৱৰণ এনে ধৰণৰ- (ক) ৰঙিয়া ৰাজহ চক্ৰৰ অন্তৰ্গত কছাৰী শ’লমাৰী গাঁৱৰ দাগ নং ২২৭/২৪২, পট্টা নং ২০২, (খ) দাগ নং ৩৯০, পট্টা নং ২০২,(গ) দাগ নং ২২৭, পট্টা নং ২০২, (ঘ) দাগ নং ২২৭, পট্টা নং ২০২, (ঙ) দাগ নং ৩৯১, পট্টা নং ১৬৭, (চ) দাগ নং ৩৯০, পট্টা নং ২০২, আৰু (ছ) দাগ নং ৩১৮, পট্টা নং ১০৫৯। এইয়া হ’ল ঘোষিত ৩ বিঘা ১০ লেচা ভূমিৰ তথ্য।
অথচ সেই একেটা ৰাজহ চক্ৰত আৰু একেখন গাঁৱৰ অনেক স্থানত প্রমোদ বড়োৰ পৰিয়ালৰ নামত অনেক ভূ-সম্পত্তি আছে। ৰঙিয়া ৰাজহ চত্ৰৰ ভিতৰত আৰু কমেও ৯ টা স্থানত বিটিচিৰ মুখ্য কার্যবাহী সদস্য প্রমোদ বড়োৰ পত্নী পাৰুল ভৰালী বড়োৰ নামত ভূ-সম্পত্তি আছে। যি তথ্য তেওঁ নির্বাচনী শপতনামাত গাপ দিছে।
সেই ভূ-সম্পত্তিৰ বিৱৰণ এনে ধৰণৰ- (ক) ৰঙিয়া ৰাজহ চক্ৰৰ অন্তৰ্গত সাহান গাঁৱৰ ৫৬ নং পট্টাৰ ৫০৪ নং দাগৰ ১ কঠা ৮ লেচা, (খ) ৪৯৯ নং দাগৰ ১৩ লেচা, (গ) ৫০০ নং দাগৰ ১৩ লেচা, (ঘ) ৫০১ নং দাগৰ ১৩ লেচা, (ঙ) ৫০৪ নং দাগৰ ১৪ লেচা আৰু (চ) একেটা দাগতে আৰু ১ কঠা ৯ লেচা ভূমি, (ছ) কছাৰী শ’লমাৰী গাঁৱৰ ৩৩৯ নং পট্টাৰ ১০৮৫ দাগৰ ৩ কঠা প্রথম শ্ৰেণীৰ বাৰী মাটি, (জ) কছাৰী শ’লমাৰীৰ ৬০ নং পট্টাৰ ৪৫০ নং দাগৰ ৩ কঠা ৬ লেচা আৰু (বা) কছাৰী শ’লমাৰী গাঁৱৰ ৯০ নং পট্টাৰ ২২৮ নং দাগৰ ৪ কঠা ভূমি।
মন কৰিবলগীয়া কথাটো হ’ল, নির্বাচনী শপতনামাত সাহান গাঁৱৰ নামেই উল্লেখ কৰা নাই প্রমোদ বড়োরে। কিন্তু অসম চৰকাৰৰ ৰাজহ বিভাগৰ তথ্য অনুসৰি পাৰুল ভৰালীৰ লগতে ডাঃ হিতেন্দ্র কলিতা, দিগন্ত ডেকা, অলিন্দা শর্মা, অনুপম শর্মা, পাৰুল ভৰালী আৰু দীপক কুমাৰ বাজাজৰ নামত সাহান গাঁৱত ৬ টা স্থানত ভূ-সম্পত্তি নামজাৰী হৈ আছে। এই ভূমিখিনি ২০২৩ চনৰ ১ ডিচেম্বৰ আৰু ২০২৪ চনৰ ২২ জানুৱাৰীত ক্ৰয় কৰা বুলি চৰকাৰী নথিত উল্লেখ আছে। একেদৰে কছাৰী শ’লমাৰীত পাৰুল ভৰালীৰ নামত থকা আন ২ বিঘা ৬ লেচা মাটিৰ তথ্যও প্রমোদ বড়োৰ শপতনামাত উল্লেখ নাই। এইয়া জনপ্রতিনিধি আইন, ১৯৫১ ৰ গুৰুতৰ উলংঘন। প্রমোদ বড়োৰ এই জালিয়াতিক লৈ নিৰ্বাচন আয়োগৰ দ্বাৰস্থ হৈছে ৰাইজৰ দলৰ সভাপতি অখিল গগৈ। অখিল গগৈয়ে নির্বাচন আয়োগৰ ওচৰত অভিযোগ দাখিল কৰি প্রমোদ বড়োৰ প্ৰাৰ্থিত্ব খাৰিজ কৰাৰ দাবী উত্থাপন কৰে। তেওঁ কয় যে সম্পত্তিৰ তথ্য লুকুৱাই প্রমোদ বড়োৱে কেৱল তেওঁৰ ক’লা আৰু গোপন অধ্যায় গাপ দিয়াই নহয়, বিটিআৰবাসীকো চৰম প্ৰতাৰণা কৰিছে।
