২০১৪ চনত ৰাজ্যখনৰ এগৰাকী অত্যুৎসাহী আলোক চিত্ৰ শিল্পী দেৱাশীষ বৰুৱাই ফেচবুকৰ জৰিয়তে আৰম্ভ কৰা আলোক চিত্ৰৰ এক অভিনৱ শিল্পৰ সন্ধানে সম্প্ৰতি এক নৱজাগৰণৰ সৃষ্টি কৰিছে। সাম্প্ৰতিক সময়ৰ এটি জনপ্ৰিয় সামাজিক গণ মাধ্যম ফেচবুকত কেণ্ডিড ক্লিক্ছ হিচাপে পৰিচিত এই গোটৰ এখনি বৰ্ণাঢ্য আলোক চিত্ৰ প্ৰদৰ্শনী ১৪ জুলাইৰ পৰা আৰম্ভ হৈছে আৰু অহা ১৯ জুলাইলৈকে চলিব। উদ্যোক্তাসকলে জনোৱা মতে এইখন কেণ্ডিড ক্লিক্ছৰ চতুৰ্থ বাৰ্ষিক প্ৰদৰ্শনী।
আলোকচিত্ৰ প্ৰদৰ্শনীখন উদ্বোধন কৰে বিশিষ্ট অধিবক্তা, লেখক আৰু অভিনেতা দিলীপ কুমাৰ হাজৰিকাই। উদ্বোধনী অনুষ্ঠানত মুখ্য অতিথি হিচাপে বিশিষ্ট চলচ্চিত্ৰ পৰিচালক তথা চিত্ৰশিল্পী পুলক গগৈ আৰু সন্মানীয় অতিথি হিচাপে বিশিষ্ট অধিবক্তা অৰূপ বৰবৰা উপস্থিত থাকে। যশস্বী আলোক চিত্ৰশিল্পী সঞ্জীৱ গোঁহাই বৰুৱাই উদ্বোধনী সভাত সভাপতিত্ব কৰে।
কেণ্ডিড ক্লিকছৰ এনে উদ্যোগক ভূয়সী প্ৰশংসা কৰি অতিথি কেইগৰাকীয়ে আলোকচিত্ৰ সম্পৰ্কত নিজৰ নিজৰ দৃষ্টিভংগী প্ৰকাশ কৰে। ক’লা-বগা আলোকচিত্ৰৰ পৰা বৰ্তমানৰ প্ৰযুক্তিগতভাৱে উন্নীত বহুবৰ্ণী আলোকচিত্ৰৰ আকৰ্ষণলৈকে সামৰি তেওঁলোকে এক সৰস অভিব্যক্তি দাঙি ধৰে।
প্ৰদৰ্শনীখন উপভোগ কৰি উপস্থিত দৰ্শকসকলে এইকেইদিন আলোকচিত্ৰসমূহৰ প্ৰশংসা কৰাৰ লগতে এনে ধৰণৰ প্ৰয়াসৰ শলাগ লয়। বহুকেইগৰাকী নবীন আলোকচিত্ৰ শিল্পীয়ে প্ৰথমবাৰৰ বাবে এইবাৰ প্ৰদৰ্শনীত আলোকচিত্ৰ প্ৰদৰ্শন কৰিছে আৰু উষ্ণ আৱেগেৰ দৰ্শকৰ প্ৰতিক্ৰিয়া লক্ষ্য কৰিছে।
প্ৰদৰ্শনীত কেইখনমান অতি উচ্চমানৰ আলোকচিত্ৰ প্ৰত্যক্ষ কৰা গৈছে। কেৱল বিষয়বস্তুৱে নহয়, কাৰিকৰী দিশৰ পৰাও এইকেইখন ছবিয়ে যে আলোকচিত্ৰপ্ৰেমীৰ দৃষ্টি কাঢ়িব তাত সন্দেহ নাই। আনহাতে, অধিক সংখ্যক আলোকচিত্ৰ প্ৰকৃতিৰ নিৰ্ভাৰ প্ৰতিৰূপ হোৱাৰ বিপৰীতে কেইখনমান আলোকচিত্ৰত প্ৰতিফলিত হৈছে জীৱন সংগ্ৰামৰ নান্দনিক মুহূৰ্ত। মুঠতে প্ৰদৰ্শনীৰ আলোকচিত্ৰসমূহে দৰ্শকক অৱশ্যেই আপ্লুত কৰিব।
ইপিনে আলোকচিত্ৰ প্ৰদৰ্শনীখনৰ মূল উদ্যোক্তা তথা এগৰাকী আলোকচিত্ৰ শিল্পী দেৱাশীষ বৰুৱাই কয় যে ইয়াৰ জৰিয়তে বহু প্ৰতিভাৱান নৱ প্ৰজন্মই এই দিশত আলোকপাত কৰি এটি শুভময় দিনৰ ইংগিত বহন কৰি আহিছে।
অনাগত সময়ত কেণ্ডিড ক্লিক্ছৰ পৰা আৰু অধিক গতিশীল তথা জীৱনমুখী আলোকচিত্ৰৰ সমাহাৰ আশা কৰাটো অৱশ্যেই ভুল নহ’ব।
