মুখ্য মন্ত্ৰী সৰ্বানন্দ সোণোৱাল আৰু আবকাৰী মন্ত্ৰীৰ নিৰ্দেশ মৰ্মে আজি আবকাৰী আয়ুক্তৰ নেতৃত্বত আবকাৰী বিভাগৰ উচ্চ পৰ্যায়ৰ প্ৰতিনিধিৰ এটা দল কোকৰাঝাৰৰ নিহত আবকাৰী বিষয়া নাৰায়ণ বৰালৰ পৰিয়ালক সাক্ষাৎ কৰিবলৈ কোকৰাঝাৰলৈ যায়। প্ৰতিনিধিৰ দলটোৱে ৰাজ্য চৰকাৰৰ হৈ পৰিয়ালটোক সমবেদনা জ্ঞাপন কৰে। লগতে বৰালৰ পৰিয়ালে ন্যায় আৰু যাৱতীয় সাহায্য পোৱাৰ বাবে যথোচিত ব্যৱস্থাৰ আশ্বাস দিয়ে দলটোৱে।
উল্লেখযোগ্য যে ভাৰত-ভূটান সীমান্তৰ সৰলপাৰা বনাঞ্চলত অচিনাক্ত দুৰ্বৃত্তই যোৱা ২ মে’ত হত্যা কৰিছিল আবকাৰী বিভাগৰ সহকাৰী পৰিদৰ্শকজনক। এতিয়াও হত্যাকাৰীক চিনাক্ত কৰিব পৰা নাই আৰক্ষীয়ে।
মন কৰিব লগীয়া যে যোৱা ৭ মে’তো আবকাৰী বিভাগৰ কেইজন মান বিষয়াই সতীৰ্থ নাৰায়ণ বৰালৰ পৰিয়ালক সমবেদনা জনাবলৈ গৈছিল। কিন্তু হত্যাকাৰীক চিনাক্ত কৰাত আৰক্ষীৰ ব্যৰ্থতাত ক্ষুভিত হৈ থকা স্থানীয় লোকে আবকাৰী বিভাগৰ বিষয়াকেইজনক আক্ৰমণ সংঘটিত কৰিছিল। স্থানীয় ৰাইজে আবকাৰী বিষয়াৰ দলটোক কঢ়িয়াই নিয়া এ এছ ২৬ এ ৯২৩৪ নম্বৰৰ টাটা ছুম’ গাড়ীখনো ভাঙি চূৰ্ণ-বিচূৰ্ণ কৰিছিল। কোনোমতেহে সাৰি আহিছিল আবকাৰী বিষয়া-কৰ্মচাৰীৰ দলটো।
