নাগালেণ্ড বিধানসভা নিৰ্বাচনৰ ভোট গণনাৰ বাবে ১২ ঘণ্টাতকৈ কম সময় থকা অৱস্থাত নাগা বিদ্ৰোহী সংগঠন এন এছ চি এন (আই এম)-এ ৰাজ্যখনৰ পৰৱৰ্তী চৰকাৰখন সন্দৰ্ভত এক তাৎপৰ্য্যপূৰ্ণ মত আগ বঢ়াইছে।
সংগঠনটোৱে এক প্ৰকাৰৰ দৃঢ়তাৰে কয় যে পৰৱৰ্তী চৰকাৰখন আঞ্চলিক দল এন পি এফেই গঠন কৰিব। সংগঠনটোৰ গৃহ বিভাগৰ সচিবে নিজৰ বক্তব্যৰ জৰিয়তে এই তাৎপৰ্য্যপূৰ্ণ বাৰ্তা দিছে।
আনহাতে লক্ষণীয়ভাৱে সংগঠনটোৰ মতে নেইফিঅ’ ৰিঅ’ৰ নেতৃত্বাধীন নৱগঠিত এন ডি পি পিৰ কোনো গণভিত্তি নাই। দলটোক নাগা ৰাইজে প্ৰত্যাখান কৰিছে বুলিও তেওঁ তাৎপৰ্য্যপূৰ্ণ মন্তব্য কৰে।
লগতে সচিবজনে মন্তব্য কৰে যে শেষত বিজেপিয়েও চৰকাৰ গঠনত সহযোগ কৰিব।
আনহাতে এন পি এফৰ অধ্যক্ষ ড০ শ্বুৰহোনজেলি লেইজিটছুৱে ৰাজ্যপাল পি বি আচাৰ্য্যক কালি (বৃহস্পতিবাৰে) সাক্ষাৎ কৰি এখন পত্ৰৰ জৰিয়তে এন পি এফ দলটোৱে এন পি পি আৰু জে ডি (য়ু)ৰে প্ৰাক-নিৰ্বাচনী মিত্ৰতা কৰা বুলি অৱগত কৰে।
ভোট গণনাৰ কেইঘণ্টামান পূৰ্বে ৰাজ্যখনত দেখা পোৱা এই নতুন ৰাজনৈতিক অগ্ৰগতিয়ে বিশেষ তাৎপৰ্য্য বহন কৰিছে। ৰাজনৈতিক বিশ্লেষকে জনোৱা মতে বিজেপিয়ে যদিও পূৰ্বৰ মিত্ৰ দল তথা শাসনাধিষ্ঠিত এন পি এফৰ সংগ এৰি নৱগঠিত এন ডি পি পি (যাৰ নেতৃত্বত আছে এন পি এফৰ বিৰোধী শিবিৰৰ নেতা নেইফিঅ’ ৰিঅ’) সৈতে প্ৰাক-নিৰ্বাচনী মিত্ৰতা কৰিছিল, গেৰুৱা দলটো শাসনৰ অংশীদাৰ হোৱাৰ স্বাৰ্থত পুনৰ এন পি এফৰ কাষ চাপিলেও আচৰিত হ’ব লগীয়া নাই।
উল্লেখযোগ্য যে যোৱা ২৭ ফেব্ৰুৱাৰিত অনুষ্ঠিত নিৰ্বাচনৰ ভোটগণনা কাইলৈ, অৰ্থাৎ ৩ মাৰ্চত সম্পন্ন হ’ব। তাৰ পৰিপ্ৰেক্ষিতত সঘন ৰাজনৈতিক পটপৰিৱৰ্তনত থকা ৰাজ্যখনত এটা প্ৰধান নিয়ন্ত্ৰক শক্তি এন এছ চি এন (আই এম)ৰ এই মন্তব্যই বিশেষ তাৎপৰ্য্য বহন কৰিছে।
