এল্যুৰ ফেশ্যন ট্যুৰ মিছ ইণ্ডিয়া ২০১৮ত ছিকিমৰ বন্দনা ৰাইয়ে মিছ ইণ্ডিয়াৰ খিতাপ জয় কৰিছে। এই প্ৰতিযোগিতাত তেওঁ মিছ ৰেম্প-ৱাক খিতাপো অৰ্জন কৰিছে। উল্লেখ্য যে উত্তৰ-পূৰ্বাঞ্চলৰ পৰা এই প্ৰতিযোগিতাত অংশগ্ৰহণ কৰা তেৱেঁই একমাত্ৰ প্ৰতিদ্বন্দ্বী।
১৯ বছৰীয়া বন্দনা হৈছে শোভা ৰাই আৰু প্ৰয়াত ধন ৰাজ ৰাইৰ কন্যা। তেওঁ পূব ছিকিমৰ গেংটকৰ ছিচেৰ বাসিন্দা। টাডংস্থিত ছিকিম গভৰ্নমেণ্ট কলেজৰ তেওঁ দ্বিতীয় ষান্মাষিকৰ ছাত্ৰী। ২০১৬ চনত বন্দনাই মিছ কিৰৱা ৰাই ছিকিম খিতাপো অৰ্জন কৰিছিল।
নতুন দিল্লীৰ অশোকা হোটেলত এল্যুৰ ফেশ্যন ট্যুৰ মিছ আৰু মিছেছ ইণ্ডিয়া ২০১৮ৰ আয়োজন কৰিছে এল্যুৰ টেবলইডৰ স্বত্বাধিকাৰী দেব জিন্দালে। এই প্ৰতিযোগিতা তিনিটা বিভাগত আয়োজন কৰা হৈছে-মিছেছ ক্লাছিক, মিছেছ ইণ্ডিয়া আৰু মিছ ইণ্ডিয়া। ১ মে’ৰ পৰা ৩ মে’লৈকে প্ৰতিযগিতাখনৰ গ্ৰুমিং ছেছন আয়োজন কৰা হৈছিল আৰু গ্ৰেণ্ড ফিনালি অনুস্থিত হৈছিল ৪ মে’।
জানিব পৰা গৈছে যে ৫০গৰাকীতকৈও অধিক প্ৰতিযোগীয়ে এই প্ৰতিযোগিতাত অংশগ্ৰহণ কৰিছিল আৰু ১৯ গৰাকীক গ্ৰেণ্ড ফিনালিৰ বাবে বাছনি কৰা হৈছিল। গ্ৰেণ্ড ফিনালিত বন্দনা বিজয়ী হৈছিল।
গৃহ চহৰ গেংটকলৈ উভতি অহাৰ পাছত বন্দনাই মিছ ইণ্ডিয়া ২০১৮ত বিজয়ী হোৱাৰ বাবে তেওঁৰ আনন্দ প্ৰকাশ কৰিছিল। দেশৰ বিভিন্ন ৰাজ্যৰ পৰা অহা সৰ্বোত্তম মডেলসকলে অংশগ্ৰহণ কৰা এই প্ৰতিযোগিতা অত্যন্ত কঠিন আছিল আৰু ইয়াত তেওঁ বহুপতো কথা শিকিব পাৰিছিল বুলি কৈছে। প্ৰতিযোগিতাত বিজয়ী হোৱাৰ পাছত বন্দনাই আয়োজকসকলৰ সৈতে এবছৰৰ চুক্তিবদ্ধ হৈছে আৰু এখনদক্ষিণ ভাৰতীয় চিনেমাত অভিনয়ৰ আমন্ত্ৰণ লাভ কৰিছে।
বন্দনাই এতিয়া পৰবৰ্তী বৰ্ষৰ ফেমিনা মিছ ইণ্ডিয়া প্ৰতিযোগিতাত অৱতীৰ্ণ হোৱাৰ বাবে পূ্ণ আয়োজন কৰি থকাৰ কথা প্ৰকাশ কৰিছে। মডেলিঙৰ উপৰিও বন্দনাৰ অভিনয় আৰু নৃত্যৰ প্ৰতি আগ্ৰহ আছে। তেওঁ আৰু কয় যে স্নাতক হোৱাৰ পাছত তেওঁ মডেলিং আৰু অভিনয়ত সম্পূৰ্ণভাৱে মনোনিৱেশ কৰিব।
মাতৃ শোভা ৰাইয়ে তেওঁৰ কন্যৰ সাফল্যত আনন্দ প্ৰকাশ কৰিছে। তেওণ কয় যে বন্দনাই শিশু কালৰ পৰাই মডেলিভৰ প্ৰতি আগ্ৰহী আছিল আৰু তেওঁ তাত কৃতকাৰ্যতা লাভ কৰিলে। তেওঁ কয় যে সকলো পিতৃ-মাতৃকে তেওঁলোকৰ সন্তানসকলক তেওঁলোকৰ সপোনৰ লক্ষ্যত উপনীত হোৱাত সহায় কৰিব লাগে।
