মঙলবাৰে এটা ভাইৰেল ভিডিঅ’ই গুজৰাটৰ ভাৰুচ জিলাৰ আমোদ পৌৰসভাক লৈ এক বৃহৎ বিতৰ্কৰ সৃষ্টি কৰে। প্ৰধানমন্ত্ৰী নৰেন্দ্ৰ মোদীৰ ৭৫ সংখ্যক জন্মদিন উপলক্ষে আৰম্ভ হোৱা ১৫ দিনীয়া ‘স্বচ্ছতা হি সেৱা’ কাৰ্যসূচীৰ প্ৰথম দিনাই সংঘটিত হয় এই ঘটনা।
ভিডিঅ’টোত আমোদ পৌৰসভাৰ সভাপতি জলপা পেটেল আৰু মুখ্য কাৰ্যবাহী বিষয়া পংকজ নায়কে নিৰ্দিষ্ট খেলপথাৰত উপস্থিত হৈয়েই কৰ্মীসকলৰ পৰা ঝাড়ু বিচৰা দেখা গৈছে। ইয়াৰ মাজতে এজন অনাময় কৰ্মীয়ে ডাষ্টবিনৰ পৰা জাবৰ উলিয়াই নিৰ্দিষ্ট পথত ছটিয়াই দিয়ে। তাৰ পিছত পেটেল আৰু নায়কৰ হাতত ঝাড়ু তুলি দিয়া হয়।
কিন্তু দুয়োজনে কেমেৰাৰ উপস্থিতি অনুভৱ কৰাৰ লগে লগে দ্বিধাবোধ কৰা দেখা গৈছে। পেটেলক এটা সময়ত পিছুৱাই যোৱা দেখা যায়, আৰু নায়কে হাতত ঝাড়ু লৈ তেওঁৰ পিছে পিছে যায়।
স্থানীয় সূত্ৰৰ পৰা জানিব পৰা মতে, পুৱাতে অনাময় কৰ্মীয়ে খেলপথাৰখন চাফা কৰিছিল। ফলত অনুষ্ঠানৰ সময়ত ঝাড়ু দিবলৈ একো আৱৰ্জনা বাকী নাথাকিল। সেইবাবেই ইচ্ছাকৃতভাৱে ঠাইখিনি লেতেৰা কৰা হৈছিল।
এই ভিডিঅ’টো পোহৰলৈ অহাৰ লগে লগে স্থানীয় কংগ্ৰেছ নেতৃত্বই বিজেপিক তীব্ৰ আক্ৰমণ কৰে। ভাৰুচ যুৱ কংগ্ৰেছৰ নেতা কেতন মাকৱানাই কয়, “এয়া এক প্ৰহসন। যেতিয়া সাধাৰণ জনতাই লেতেৰা পৰিৱেশত ভুগি আছে, মহৰ দ্বাৰা সংক্ৰমিত ৰোগ বিয়পাইছে, তেতিয়া পৌৰসভা আৰু বিজেপিৰ নেতাসকলে ৰাইজৰ সমস্যা সমাধানৰ পৰিৱৰ্তে ফটোশ্বুটৰ ৰাজনীতি কৰিছে। ইয়াৰ বাবে জলপা পেটেলে ৰাজহুৱাভাৱে ক্ষমা খুজিব লাগে।”
আনহাতে, ৰাজ্যৰ বহু ঠাইত অনাময় ব্যৱস্থাৰ অভাৱ চকুত পৰা বুলি কংগ্ৰেছে অভিযোগ উত্থাপন কৰে। ডেংগু, মেলেৰিয়াকে ধৰি বিভিন্ন সংক্ৰামক ৰোগৰ প্ৰাদুৰ্ভাৱ বৃদ্ধি পাইছে। কিন্তু পৌৰসভা আৰু শাসকীয় দলৰ নেতাসকল কেৱল ইভেণ্ট মেনেজমেণ্টত ব্যস্ত।
অখিল ভাৰতীয় চাফাই মজদুৰ সংঘৰ অমোদ শাখাৰ নেতা হিৰাভাই ছোলাংকিয়ে কয় যে ঘটনাত জাবৰ পেলোৱা ব্যক্তিজনে এই নিৰ্দেশ অমান্য কৰিব নোৱাৰিলে। “আমি নিম্নবৰ্গৰ কৰ্মী। কৰ্তৃপক্ষৰ নিৰ্দেশ পালন কৰাৰ বাহিৰে আন উপায় নাই। আমাৰ চাকৰি বচাবলৈ আৱৰ্জনা পেলাবলৈ বাধ্য হৈছিলো। আমি যদি সেইবোৰ পালন নকৰিলোহেঁতেন তেন্তে লগে লগে আমাৰ চাকৰি গ’লহেঁতেন।” এই মন্তব্যই নতুন প্ৰশ্নৰ উত্থাপন কৰিছে – নিম্নস্তৰৰ কৰ্মীসকলক কেনেকৈ ৰাজনৈতিক কামত ব্যৱহাৰ কৰা হৈছে।
ভাৰুচ জিলা বিজেপিৰ সভাপতি প্ৰকাশ মোদীয়ে স্বীকাৰ কৰে যে তেওঁ ব্যক্তিগতভাৱে বহু লোকৰ পৰা ভিডিঅ’টো লাভ কৰিছে। তেওঁ কয়, ‘ৰাজ্যৰ কাৰ্যনিৰ্বাহক সভাত বিষয়টো আলোচনা কৰা হ’ব।দলে কাকো নাটক সৃষ্টি কৰিবলৈ কোৱা নাছিল। প্ৰত্যেককে প্ৰকৃত চাফাই কাম কৰিবলৈ কোৱা হৈছে। কোনো নেতাই যদি নিজৰ ব্যক্তিগত সিদ্ধান্তত ভুল কৰে তেন্তে তাৰ দায়িত্ব ল’ব লাগিব।”
তেওঁ লগতে কয় যে চাফাই অভিযান ১৭ ছেপ্টেম্বৰৰ পৰা আৰম্ভ হৈ প্ৰতি বছৰে ২ অক্টোবৰত শেষ হয়। ইয়াৰ উদ্দেশ্য ৰাইজৰ মাজত সজাগতা বিয়পাই দিয়া, কেমেৰাৰ সন্মুখত দেখুৱাবলৈ নহয়।
ঘটনাৰ পিছৰে পৰা অমোদকে ধৰি সমগ্ৰ ভাৰুচ জিলাত আলোড়নৰ সৃষ্টি হৈছে। সাধাৰণ জনতাও ক্ষুব্ধ হৈ পৰিছে। তেওঁলোকৰ বক্তব্য – “নেতাসকলে ফটো তুলিবলৈ অনাময় কৰ্মীসকলক দি মাটি লেতেৰা কৰা মানে চৰকাৰৰ স্বচ্ছতা অভিযানক কৌতুকলৈ ৰূপান্তৰিত কৰা।”
ৰাজনৈতিক মহলে ধাৰণা যে এই ঘটনাই বিজেপিৰ ভাবমূর্তিত ডাঙৰ আঘাত কৰিছে৷ স্বচ্ছ ভাৰত অভিযানৰ সৈতে মোডীৰ দীৰ্ঘদিনীয়া প্ৰচেষ্টাক লৈ প্ৰশ্ন উত্থাপন হৈছে। স্থানীয় নেতৃত্বৰ এনে আচৰণে বিৰোধীৰ হাতত এটা ৰাজনৈতিক আহিলা দিছে।
অমোদ কাণ্ডই স্পষ্ট কৰি দিয়ে যে বিজেপিৰ স্বচ্ছতা অভিযানৰ বাবে আন্তৰিক প্ৰচেষ্টাতকৈ আনুষ্ঠানিকতাহে বেছি। ৰাইজক আভুৱা ভৰা নীতিৰে শাসন চলোৱা নেতাৰ এনে কাণ্ড দলটোৰ বাবেই লজ্জাজনক হৈ পৰিছে। এতিয়া জলপা পেটেল আৰু পৌৰসভাৰ বিষয়া পংকজ নায়কৰ বিৰুদ্ধে বিজেপিৰ ৰাজ্যিক নেতৃত্বই কি ব্যৱস্থা গ্ৰহণ কৰে সেয়া লক্ষ্যণীয় হৈ পৰিছে।
