বহু আকাংক্ষিত ২৮ সংখ্যক ‘বাৰেচহৰীয়া ভাওনা’ অহা মাৰ্চ মাহত চাৰিদিনীয়া কাৰ্যসূচীৰে শোণিতপুৰ জিলাৰ জামুগুৰিহাটত অনুষ্ঠিত হ’ব। ২১৩ বছৰীয়া ঐতিহ্যমণ্ডিত এই ভাওনা মহোৎসৱক সাফল্য মণ্ডত কৰি তোলাৰ বাবে সকলো কাম কাজ পূৰ্ণ গতিত চলি আছে।
এই মাহৰে আৰম্ভণিতে জামুগুৰিহাটৰ বাসিন্দাসকলে ঐতিহাসিক পকামূৰা পথাৰত বাৰেচহৰীয়া ভাওনাৰ লাই খুঁটা স্থাপন কৰাৰ লগতে ধৰ্মীয় পতাকা উত্তোলন কৰে।.
উল্লেখ্য যে ১ মাৰ্চৰ পৰা ৪ মাৰ্চলৈ জামুগুৰিহাটত হ’বলগীয়া ভাওনা মহোৎসৱৰ বাবে ২১ খন খোলা সাজু কৰিব য’ত বিভিন্ন প্ৰান্তৰ ভাওনা শিল্পী সকলে তেওঁলোকৰ ভাওনা প্ৰদৰ্শন কৰিব।
ধৰ্মীয় পতাকা উত্তোলন কৰে বিশিষ্ট সমাজ কৰ্মী লক্ষীনাথ কাকতি, জগত চন্দ্ৰ দাস, স্থানীয় বিধায়ক পদ্ম হাজৰিকা, আয়োজক সমিতিৰ উপ সভাপতিৰ লগতে বিভিন্ন ধৰ্মালম্বী লোকে।
ইফালে জামুগুৰিহাটৰ বিদ্যালয় সমূহৰ ছাত্ৰ-ছাত্ৰী তথা বিভিন্ন বেচৰকাৰী অনুষ্ঠান-প্ৰতিষ্ঠানে ভাওনা মহোৎসৱস্থলী চাফ-চিকুন কৰাত ব্যস্ত হৈ পৰা পৰিলক্ষিত হৈছে।
একেলগে ১২৬ জন গায়ন আৰু ২১০ জন বায়নৰ প্ৰদৰ্শনীৰ মাজেৰে বাৰেচহৰীয়া ভাওনাৰ লাই খুঁটা স্থাপন কৰা হৈছিল।
অসমৰ ঐতিহাসিক ভাওনা মহোৎসৱখনত ভাৰতৰ কেন্দ্ৰীয় গৃহ মন্ত্ৰী ৰাজনাথ সিঙো উপস্থিত থাকিব বুলি আয়োজকে জানিবলৈ দিয়ে।
১৭৯৭ চনত প্ৰথম বাৰৰ বাবে আৰম্ভ হোৱা বাৰেচহৰীয়া ভাওনা এইবেলি ভৰি দিলে ২১৩ বছৰত।
পৰম্পৰাগত ভাওনা কেৱল নামঘৰ আৰু শংকৰদেৱে শংকৰী ধৰ্মৰ বাবে প্ৰতিষ্ঠা কৰা সত্ৰ সমূহতহে প্ৰদৰ্শন কৰা হয়।
পৰম্পৰাগত ভাওনাৰ পৰাই বাৰেচহৰীয়া ভাওনাৰ উদ্ভৱ হোৱা বুলি বহুতেই কয় আৰু ই অন্যান্য ভাওনা সমূহতকৈ পৃথক। বাৰেচহৰীয়া ভাওনাত বিভিন্ন দলে প্ৰদৰ্শন কৰা দেখা যায়। ৰাজ্যৰ বিভিন্ন অঞ্চল, গাওঁ আদিৰ পৰা দলসমূহ আহি এই মহোৎসৱত ভাওনা প্ৰদৰ্শন কৰিব।
উল্লেখযোগ্য যে বাৰেচহৰীয়া ভাওনা প্ৰতি পাঁচ-ছয় বছৰৰ মূৰে মূৰে অনুষ্ঠিত হোৱা পৰিলক্ষিত হয়। ইয়াৰ আগৰ ২৭ বাৰেচহৰীয়া ভাওনা ২০১৩ চনত অনুষ্ঠিত হৈছিল।
