বিগত বৰ্ষৰ দৰে এইবছৰো জ্যোতি-বিষ্ণু সাংস্কৃতিক মঞ্চ আৰু জি এল পি ছ’চিয়েল চাৰ্কলে যুটীয়াভাবে কলাগুৰু বিষ্ণুপ্ৰসাদ ৰাভাৰ ওপজা দিনটো আড়ম্বৰপূৰ্ণভাবে উদযাপন কৰাৰ প্ৰস্তুতি চলাইছে। অহা ৩১ জানুৱাৰী বুধবাৰে ‘ওপজা দিনত কলাগুৰু বিষ্ণুপ্ৰসাদ ৰাভালৈ একাঁজলি শ্ৰদ্ধাঞ্জলি’ শীৰ্ষক নামৰ এটি অনুষ্ঠানেৰে শিল্পীজনক শ্ৰদ্ধাঞ্জলী জ্ঞাপন কৰিব।
৩১ তাৰিখে বিয়লি ৪ বজাৰ পৰা গুৱাহাটী উজান বজাৰৰ ছহিদ ভৱনত অনুষ্ঠিত হ’বলগা অনুষ্ঠানত মহান শিল্পীজনাক ৰাজহুৱাভাৱে শ্ৰদ্ধাঞ্জলি জ্ঞাপন কৰাৰ উপৰি অসমৰ বৰ্তমান কালৰ দুগৰাকী বৰেণ্য কণ্ঠশিল্পী পুলক বেনাৰ্জী আৰু ড০ সংগীতা কাকতীক সম্বৰ্ধনা জনোৱা হ’ব।
প্ৰত্যেক বছৰৰ দৰেই এই বছৰো ৰঞ্জন কুমাৰ ভট্টাচাৰ্যৰ পৰিচালনা আৰু জ্যোতি-বিষ্ণু সাংস্কৃতিক মঞ্চৰ দ্বাৰা প্ৰয়োজিত, ‘তোৰে মোৰে আলোকৰে যাত্ৰা’ শীৰ্ষক জ্যোতি সংগীত আৰু বিষ্ণু ৰাভা সংগীতৰ এটি শ্ৰব্য সংকলন প্ৰকাশেৰে শিল্পীগৰাকীক শ্ৰদ্ধাঞ্জলী জনাব। অসমৰ বিভিন্ন প্ৰান্তৰ ন-পুৰণি তথা বিভিন্ন বয়সৰ শিল্পীসকলৰ কণ্ঠেৰে বাণীবদ্ধ কৰা হৈছে এই সংকলনটি।
যোৱা বছৰৰ ২৪ৰ পৰা ৩১ ডিচেম্বৰলৈ গুৱাহাটী কৰ্মাছ কলেজত আয়োজিত ৰূপকোঁৱৰ জ্যোতিপ্ৰসাদ আগৰৱালাৰ গান আৰু সৃষ্টিশীল কৰ্মৰাজি শীৰ্ষক কৰ্মশালা আৰু আলোচনাচক্ৰত অংশগ্ৰহণকাৰী সকলৰ মাজত আয়োজিত ৰচনা প্ৰতিযোগিতাত স্থান লাভ কৰা ৰচনাসমূহৰ এটি সংকলনো উন্মোচন কৰা হ’ব বুলি আয়োজকে জানিবলৈ দিছে।
উক্ত প্ৰতিযোগিতাত স্থান লাভ কৰা লিখক তথা প্ৰশিক্ষাৰ্থীসকল হ’ল ‘ক’ শাখাৰ প্ৰথম হৰ্ষৰাজ কাশ্যপ, দ্বিতীয় জিনি কাশ্যপ, তৃতীয় আয়ুস্মান চক্ৰৱৰ্তী, চতুৰ্থ হূষীকেশ শইকীয়া আৰু পঞ্চম খ্যাতিশ্ৰেয়া নাথ। ‘খ’শাখাৰ প্ৰথম ববিতা গোস্বামী, দ্বিতীয় দৰ্শনা দেৱী, তৃতীয় মহাশ্বেতা গোস্বামী, চতুৰ্থ ভাৰ্লিন দাস, পঞ্চম জুলি ৰাজবংশী।
