কাইলৈ অৰ্থাত ২৫মাৰ্চত ৰামনৱমী উপলক্ষ্যে বিশ্বহিন্দু পৰিষদ দক্ষিণ পূৰ্ব প্ৰান্তৰ ব্যৱস্থাপনাত শিলচৰৰ ইণ্ডিয়া ক্লাব আৰু টাউন ক্লাব ময়দানত শ্ৰীশ্ৰী ৰামনৱমী, গায়ত্ৰী মহাযজ্ঞ আৰু বিশাল হিন্দু সন্মিলন অনুষ্ঠিত হ’ব।
হিন্দু ধৰ্মৰ বিভিন্ন সংগঠনৰ ‘স্বামীজী’ আৰু ‘মহাৰাজবৃন্দ’ই অংশগ্ৰহণ কৰিবলগীয়া উক্ত সন্মিলনত বিশ্ব হিন্দু পৰিষদৰ কেন্দ্ৰীয় কৰ্মকৰ্তা ড০ সুৰেন্দ্ৰ কুমাৰ জৈন প্ৰধান বক্তা হিচাপে উপস্থিত থাকিব।
আজি এই সন্দৰ্ভত অনুষ্ঠানস্থলীত এক সংবাদমেল পাতি শিলচৰ বিশ্ব হিন্দু পৰিষদৰ সম্পাদক স্বপন শুক্লবৈদ্য, কৰ্মকৰ্তা পূৰ্ণ চন্দ্ৰ মণ্ডল, গোপাল ভট্টাচাৰ্য আৰু মান্না মুখাৰ্জীয়ে কয় যে উক্ত সন্মিলনখনত পঞ্চাচ হাজাৰ লোকৰ সমাবেশ হ’ব বুলি তেওঁলোকে আশা কৰিছে।
সংবাদমেলত তেওঁলোকে, ‘ৰাম মন্দিৰ নিৰ্মাণ আমাৰ প্ৰধান লক্ষ্য। প্ৰয়োজন হ’লে বিধেয়ক কৰি আইন পাছ কৰি হ’লেও ৰাম মন্দিৰ নিৰ্মাণ কৰিব লাগিব।’ বুলি মন্তব্য কৰে। লগতে, আগ্ৰাৰ তাজমহল মোগল শাসনৰ পূৰ্বে মন্দিৰ আছিল বুলিও এক বিতৰ্কিত মন্তব্য আগবঢ়ায়।
অনুষ্ঠানটোৰ অধিবাস উপলক্ষ্যে আজি দুপুৰীয়া কল্যাণ আশ্ৰমৰ পৰা বৰাক নদীৰ পাৰৰ অন্নপূৰ্ণা ঘাটলৈ কলহ যাত্ৰা অনুষ্ঠিত কৰা হয়। তদুপৰি বিয়লি শিলচৰৰ পৰা মহাচড়কলৈ বিশাল বাইক আৰু ইৰিক্সাৰ ৰেলী অনুষ্ঠিত হয়।
আনহাতে কাইলৈ পুৱা ৮ মান বজাৰ পৰা মহাযজ্ঞ, আলোচনা সভা আৰু মহাপ্ৰসাদ বিতৰণ কাৰ্য্যসূচী গ্ৰহণ কৰা হৈছে বুলি তেওঁলোকে জানিবলৈ দিয়ে।
