চতিয়া আৰক্ষীৰ জালত পৰিছে অস্ত্ৰসহ দুই চোৰাংচিকাৰী। চতিয়া আৰক্ষীয়ে গঁড় হত্যাৰ বাবে কাজিৰঙা ৰাষ্ট্ৰীয় উদ্যানৰ ষষ্ঠ সংযোজনত প্ৰবেশৰ চেষ্টা কৰা দুজনকৈ গঁড়ৰ চোৰাং চিকাৰীক কৰায়ত্ব কৰিছে।
প্ৰাপ্ত তথ্য মতে, গঁড় হত্যাৰ উদেশ্যেৰে কাজিৰঙাৰ ষষ্ঠ সংযোজন এলেকাত প্ৰৱেশৰ চেষ্টা চলাওঁতেই চতিয়াৰ কৰৈয়নিত আৰক্ষীয়ে বালিজুৰি নিৱাসী চানু গুৰুং আৰু ভালুকপুংৰ নিৱাসী মহাৰাম মনচুৰি নামৰ গঁড়ৰ চোৰাং চিকাৰী দুজনক এখন এল্ট’ গাড়ীসহ আটক কৰে।
ধৃত চোৰাং চিকাৰী দুজনৰ পৰা আৰক্ষীয়ে এটা পইণ্ট ৩১৫ ৰাইফল, ১০ ৰাউণ্ড সক্ৰিয় গুলী, ম’বাইল ফোন আৰু কেতবোৰ আপত্তিজনক সামগ্ৰী উদ্ধাৰ কৰিছে ৷
সম্প্ৰতি আৰক্ষীয়ে জেৰা কৰি থকা ধৃত চোৰাং চিকাৰী দুজনৰ পৰা গঁড় হত্যাৰ সন্দৰ্ভত আৰু বহু তথ্য ওলোৱাৰ সম্ভাৱনা আছে বুলি আৰক্ষীয়ে জানিবলৈ দিছে।
আনহাতে চোৰাং চিকাৰী দুজনক আজি আদালতত হাজিৰ কৰাই বন বিভাগে দুদিনমানৰ বাবে নিজৰ জিম্মাত বিচৰাৰ সম্ভাৱনা আছে।
