কাজিৰঙা ৰাষ্ট্ৰীয় উদ্যানৰ বাগৰি বনাঞ্চলত সোমবাৰে নিশা বনকৰ্মী আৰু চোৰাংচিকাৰীৰ মাজত হোৱা প্ৰচণ্ড গুলীয়াগুলীত এজন চোৰাংচিকাৰীৰ মৃত্যু হয়। কাজিৰঙাৰ বাগৰি বনাঞ্চলৰ নলামুখ আৰু চিগা বনশিবিৰৰ মাজৰ অঞ্চলত এই গুলীয়াগুলীৰ ঘটনা সংঘৰ্টিত হৈছে ৷
বন বিভাগৰ কৰ্মীয়ে যোৱা নিশা বাগৰি বনাঞ্চলৰ কাৱৈমাৰি বনশিবিৰ এলেকাত গুলীৰ শব্দ শুনা বুলি জানিবলৈ দিয়ে। আৰু এই ঘটনাৰ সত্য সত্যতা প্ৰমাণ কৰাৰ বাবেই বন কৰ্মীৰ এটা দলে চোৰাংচিকাৰীৰ সন্ধানত অভিযান আৰম্ভ কৰে৷
চোৰাংচিকাৰীৰ সন্ধানত নামি পৰা বন বিভাগৰ দলটোৰ সৈতে অৱশেষত নলামুখ এলেকাত চোৰাং চিকাৰীৰ সংঘৰ্ষ হয়৷ কিছুসময় পাছত সংঘৰ্ষ শেষ হোৱাত ঘটনাস্থলীত অনুসন্ধান চলাওতে অভিযানকাৰী দলে এটা চোৰাংচিকাৰীৰ মৃতদেহৰ লগতে এটা গঁড়ৰ খৰ্গ , বন্দুক, গুলী বাৰুদ আৰু দুটা বেগ উদ্ধাৰ কৰে।
মৃত চিকাৰীজন নগা জনগোষ্ঠীয় লোক বুলি সন্দেহ প্ৰকাশ কৰিছে কৰ্তৃপক্ষই ৷ আনহাতে ঘটনাস্থলীৰ পৰা পলায়ন কৰা বাকী চাৰিজন চোৰাং চিকাৰীৰ সন্ধানত সম্প্ৰতি বন কৰ্মীয়ে কাজিৰঙাত ব্যাপক অভিযান অব্যাহত ৰাখিছে।
উল্লেখ্য যে ঘটনাস্থলীৰ পৰা এটা তেজেৰে লিপ্ত খৰ্গ উদ্ধাৰ হয় যদিও খৰ্গ বিহীন গঁড়টোৰ মৃতদেহ এতিয়াও উদ্ধাৰ হোৱা নাই৷ পলায় যোৱা চোৰাংচিকাৰী কেইজনৰ সন্ধানত অভিযান চলাই থকাৰ বাবেই মৃত গঁড়টো উদ্ধাৰ কৰাত কিছু পলম হোৱা বুলি জনাইছে বন বিষয়াই৷
