পুনৰ পল্টনবজাৰস্থিত গুৱাহাটী ৰেলৱে ষ্টেচনত ৰেল আৰক্ষীয়ে অভিযান চলাই জব্দ কৰিবলৈ সক্ষম হৈছে বৃহৎ পৰিমাণৰ সোণ। ৰেলৱে আৰক্ষীয়ে কালি নিশা অভিযান চলাই চাৰিজনকৈ লোকক আটক কৰিবলৈ সক্ষম হৈছে। জানিব পৰা মতে আৰক্ষীয়ে তিনিগৰাকী ধৃত মহিলা ক্ৰমে লালতাণ্ডিকা, লালমাংমাবি, লালসিংলবি আৰু ছেইলাহমুনি নামৰ যুৱকজনক আটক কৰিবলৈ সক্ষম হয়। উল্লেখযোগ্য যে ৰেলৱে আৰক্ষীয়ে অভিযান চলাই সেই ধৃতকেইজনৰ পৰা প্ৰায় ১৯ কেজি সোণ জব্দ কৰিবলৈ সক্ষম হয়। জানিব পৰা মতে ৰেল আৰক্ষীৰ নিয়মীয়া তালাচীত আইজলৰ পৰা হাওৰালৈ সৰবৰাহৰ সময়ত নামনিমুৱা শৰাইঘাট এক্সপ্ৰেছত উঠিবলৈ লওঁতে আৰক্ষীয়ে তিনিগৰাকী মহিলা আৰু এগৰাকী মিজোৰামৰ যুৱকক আটক কৰিবলৈ সক্ষম হয়। আনহাতে আন্তঃৰাষ্ট্ৰীয় বজাৰত এই সোণখিনিৰ মূল্য প্ৰায় ৬ কোটি টকা বুলি জানিব পৰা গৈছে। বৰ্তমান সময়ত আৰক্ষীয়ে মিজোৰামৰ ধৃত তিনি মহিলা আৰু যুৱকজনক জেৰা অব্যাহত ৰাখিছে।
যোৱা দেওবাৰেও ৰেলৱে আৰক্ষীয়ে অভিযান চলাই গুৱাহাটী ৰেলৱে ষ্টেচনৰ পৰা ১.৬০ কোটি টকা উদ্ধাৰ কৰিবলৈ সক্ষম হৈছিল। এনেদৰেই কোনো দুষ্ট চক্ৰই আৰক্ষীৰ চকুত ধুলি দি বিভিন্নধৰণৰ মুল্যবান সামগ্ৰী অবৈধ ভাৱে সৰবৰাহ কৰি আহিছে যদিও ৰেল আৰক্ষীয়ে তাৰ মাজৰে বহুতকে আটক কৰিবলৈ সক্ষম হৈছে।
