প্ৰতিভাৱান পেডলাৰ তৃষা গগৈয়ে ভাৰতীয় মহিলা টেবুল টেনিছ দলত স্থান লাভ কৰিবলৈ সক্ষম হৈছে। লক্ষ্যণীয় যে ১৪-১৮ ফেব্ৰুৱাৰিত চেক গণৰাজ্যত অনুষ্ঠিত হ’বলগীয়া আই টি টি এফ প্ৰিমিয়াৰ জুনিয়ৰ আৰু কেডেট অ’পেনত ভাৰতীয় দলক প্ৰতিনিধিত্ব কৰিব তৃষাই।
স্মৰ্তব্য যে ইয়াৰ আগতে তৃষাই ২০১৭ চনত বিশ্ব জুনিয়ৰ চাৰ্কিটত ভৰতীয় দলক প্ৰতিনিধিত্ব কৰিছিল। আনহাতে ২০১৭ বৰ্ষত ৰাষ্ট্ৰীয় পৰ্যায়ত দাঙি ধৰা উন্নত প্ৰদৰ্শনৰ বাবেই তৃষাক ভাৰতীয় দলত অন্তৰ্ভুক্ত কৰা হৈছে।
লক্ষ্যণীয় যে শিলিগুৰি আৰু মুম্বাইত অনুষ্ঠিত হোৱা ৰাষ্ট্ৰীয় ৰেংকিং প্ৰতিযোগিতাৰ ছাব জুনিয়ৰ শাখাত তৃষাই সগৌৰৱেৰে শ্ৰেষ্ঠত্ব অৰ্জন কৰিছিল।
ইয়াৰ উপৰি গোৱাত অনুষ্ঠিত হোৱা ৭৯ সংখ্যক ৰাষ্ট্ৰীয় আৰু আন্তঃৰাজ্যিক টেবুল টেনিছতো উন্নতমানৰ প্ৰদৰ্শন আগবঢ়াই ব্ৰঞ্জৰ পদক লাভ কৰিবলৈ সক্ষম হৈছিল।
ভাৰতৰ ছাব জুনিয়ৰ ৰেংকিঙৰ দ্বিতীয় স্থানৰ খেলুৱৈ তৃষাই পশ্চিম বংগৰ প্ৰথম ৰেংকিঙৰ খেলুৱৈ প্ৰাপ্তি সেনক দুৰ্গাপুৰত হোৱা জুনিয়ৰ আৰু ৰাষ্ট্ৰীয় প্ৰতিযোগিতাত ছোৱালীৰ ছিংগলছ শাখাত পৰাজিত কৰি এক চাঞ্চল্যৰ সৃষ্টি কৰিছিল।
অতি প্ৰতিভাসম্পন্ন খেলুৱৈগৰাকীয়ে ভাৰতীয় টেবুল টেনিছ দলত স্থান লাভ কৰা বুলি সংবাদ মাধ্যমক জানিবলৈ দিয়ে অসম টেবুল টেনিছৰ সম্পাদক ত্ৰিদিৱ দুৱৰাই।
