অসম মাধ্যমিক শিক্ষা পৰিষদৰ (ছেবা)সম্প্ৰসাৰিত অনলাইন সোৱা বুধবাৰে শিক্ষামন্ত্ৰী সিদ্ধাৰ্থ ভট্টাচাৰ্যই আনুষ্ঠানিকভাৱে উদ্বোধন কৰে। এতিয়াৰে পৰা ছাত্ৰ-ছাত্ৰীসকলে অনলাইনৰ জৰিয়তে ডুপ্লিকেট এডমিট কাৰ্ড, মাৰ্কশ্বিট, চাৰ্টিফিকেট, পঞ্জীয়ন কাৰ্ডৰ লগতে বিভিন্ন তথ্য শুধৰণিৰ সুবিধা, পৰীক্ষাৰ উত্তৰ বহী পুনৰীক্ষণ আৰু কম্পাৰ্টমেন্টল পৰীক্ষাৰ প্ৰ-পত্ৰ পূৰণৰ সুবিধাসমূহ লাভ কৰিব।
ইতিমধ্যে ছেবাই অনলাইন ব্যৱস্থাৰ জৰিয়তে ছাত্ৰ-ছাত্ৰীসকলৰ পৰীক্ষা তথা পঞ্জীয়নৰ প্ৰ-পত্ৰ পূৰণৰ লগতে যোৱা বছৰৰৰ পৰা গণিত বিষয়ৰ উত্তৰ বহী ডিজিটেল পদ্ধতিৰে মূল্যাংকনৰ ব্যৱস্থা আৰম্ভ কৰিছে।
এতিয়াৰে পৰা সম্প্ৰসাৰিত অনলাইন সেৱাৰ জৰিয়তে ছাত্ৰ-ছাত্ৰীসকলে ঘৰৰ পৰাই বা নিজৰ অঞ্চলৰ পৰাই উক্ত সুবিধাসমূহ গ্ৰহণ কৰিব পাৰিব।
অহা জুন মাহৰ পৰা ১ তাৰিখৰ পৰা এই সেৱা সমূহ ছেবাৰ ৱেবছাইট www.sebaonline.org ৰ জৰিয়তে তিনিটা সুকীয়া প’ৰ্টেল যোগে উপলব্ধ হ’ব।
বুধবাৰে বামুনীমৈদামত থকা ছেবাৰ কাৰ্যালয়ত সম্প্ৰসাৰিত অনলাইন সেৱা উদ্বোধন কৰি শিক্ষামন্ত্ৰী সিদ্ধাৰ্থ ভট্টাচাৰ্যই কয় যে অনলাইনৰ জৰিয়তে ছেবাই আগবঢ়োৱা সেৱাই ছাত্ৰ-ছাত্ৰী আৰু অভিভাৱকসকলৰ কষ্ট আৰু সময় লাঘৱ কৰাত বহুখিনি সহায় কৰিব।
ভট্টাচাৰ্যই বৰ্তমান নৱ প্ৰজন্মৰ মাজত বুৰঞ্জী ভূগোলৰ জ্ঞানৰ অভাৱৰ কথা উল্লেখ কৰি এই দুটা বিষয় পাঠ্যক্ৰমত অন্তৰ্ভুক্ত কৰাৰ পোষকতা কৰে।
অনুষ্ঠানত উচ্চতৰ মাধ্যমিক শিক্ষা সংসদৰ অধ্যক্ষ ড০ দয়ানন্দ বৰগোঁহাইয়ে কয় যে বুৰঞ্জী আৰু ভূগোল বিষয় দুটা জনপ্ৰিয় কৰি তুলিবলৈ ‘স্বদেশ অধ্যয়ন’ নামৰ পাঠ্যপুথি প্ৰৱৰ্তনৰ দিহা কৰা হৈছে।
