সদ্ভাৱণাৰ উদ্যোগত দাও ডিভিজনে আয়োজন কৰি অহা বীৰ চক্ৰ সোঁৱৰণী ফুটবল টুৰ্ণামেণ্টখন এইবাৰ ডিব্ৰুগড়স্থিত পল্টন বজাৰৰ আৰ্মি পল’ গ্ৰাউণ্ডত জানুৱাৰীৰ ২ৰ পৰা ১২ তাৰিখলৈ অনুষ্ঠিত হ’ব। প্ৰত্যেক বছৰে ভাৰতীয় সেনাই বীৰ চহিদ জিণ্টু গগৈৰ সোঁৱৰণত ২০০৪ চনৰ পৰাই এই ফুটবল প্ৰতিযোগিতাখনৰ আয়োজন কৰি আহিছে।
লক্ষ্যণীয় যে প্ৰথম বাৰলৈ ফুটবল টুৰ্ণামেণ্টখন চৌকিদিংঘী খেলপথাৰৰ পৰা আৰ্মি পল’ গ্ৰাউণ্ডলৈ স্থানন্তৰিত কৰা হোৱা বুলি আয়োজক সন্থাই জানিবলৈ দিছে। এই খেলপথাৰখন ডিব্ৰুগড় নৱম বেটেলিয়ন ৰাজপুতনা ৰাইফলে সুন্দৰভাবে সজাই পৰাই তুলিছে। এই কাৰ্যক জিলা প্ৰশাসন তথা স্থানীয়লোকে ভূয়সী প্ৰশংসা কৰে।
আয়োজক সংস্থাই জানিবলৈ দিয়া অনুসৰি প্ৰতিযোগিতাখনত মুঠ ১৬টা দলে অংশগ্ৰহণ কৰিব। আৰু এই প্ৰতিযোগিতাৰ জৰিয়তে স্থানীয় খেলুৱৈ সকল যথেষ্ট লাভান্বিত হ’ব বুলিও প্ৰকাশ কৰে।
উল্লেখযোগ্য যে ১৯৯৯চনত হোৱা ভাৰত-পাকিস্তানৰ যুদ্ধত অসমৰ জিণ্টু গগৈয়ে মৃত্যুক সাৱটি লৈছিল। এই দু:সাহসিকতাৰ বাবে মৃত্যুৰ পিছতে গগৈক ভাৰত চৰকাৰে বীৰ চক্ৰ উপাধিৰে সন্মানিত কৰিছিল।
মনকৰিবলগীয়া যে কাৰ্গিল যুদ্ধত কেপ্তেইন গগৈয়ে সাহসিকতাৰ পৰিচয় দাঙি ধৰি নিজৰ জীৱন বিপদাপন্ন কৰি পাকিস্তানৰ দুই শত্ৰুক মাৰিবলৈ সক্ষম হৈছিল যাৰ পৰিণতিত ৫২৭জন ভাৰতীয় সেনাৰ জীৱন ৰক্ষা পৰিছিল। ইয়াৰ পিছতে গোলাঘাট জিলাৰ খুমটিৰ নিবাসী জিণ্টু গগৈক অসম চৰকাৰে মৰণোত্তৰভাবে ২০০৭চনত বীৰ চিলাৰায় সন্মানেৰে সন্মানিত কৰিছিল।
