লাহোৱাল সমষ্টিৰ বিধায়ক ৰিতুপৰ্ণ বৰুৱা আৰু ডিব্ৰুগড়ৰ জিলা উপায়ুক্ত লায়া মাদুৰিয়ে আজি ডিব্ৰুগড়ৰ বৈৰাগীমঠত অসম দক্ষতা বিকাশ অভিযানৰ অধীনত এক দক্ষতা বিকাশ প্ৰশিক্ষণ কেন্দ্ৰৰ উদ্বোধন কৰে। সেই উপলক্ষে বিধায়ক বৰুৱাই কয়, ‘আত্মনিৰ্ভৰশীলতাৰ বাবে ৰাজ্যৰ নিবনুৱা যুৱক-যুৱতীসকলৰ বাবে উপযুক্ত প্ৰশিক্ষণ কাৰ্যসূচীৰ জৰিয়তে নিজৰ জ্ঞান আৰু দক্ষতা বিকাশ আৰু উন্নীত কৰাৰ বিকল্প নাই।’ অসম দক্ষতা বিকাশ অভিযানৰ অধীনত স্থাপিত এই কেন্দ্ৰটোৱে ১২ টা বিভিন্ন বৃত্তিত নিবনুৱাসকলক দক্ষতা বিকাশৰ প্ৰশিক্ষণ দিব। জিলাখনৰ নিবনুৱা সকলক এই কেন্দ্ৰটোৱে বহুলভাৱে উপকৃত কৰিব বুলি উল্লেখ কৰি জিলা উপায়ুক্ত লায়া মাদুৰিয়ে কয় যে, ‘আমাৰ লক্ষ্য হ’ব যুৱক-যুৱতীসকলক উচ্চমানৰ প্ৰশিক্ষণ প্ৰদান কৰা যাৰ যোগেদি তেওঁলোকে সহজেই উদ্যেোগসমূহত নিয়োজিত হ’ব পাৰিব।’ এইখিনিতে উল্লেখ কৰিব পাৰি যে প্ৰধান মন্ত্ৰী কৌশল বিকাশ যোজনা কেন্দ্ৰীয় দক্ষতা বিকাশ আৰু উদ্যমিতা মন্ত্ৰ্যালয়ৰ এক প্ৰধান আঁচনি। এই দক্ষতা চাৰ্টিফিকেচন আঁচনিখনৰ লক্ষ্য হৈছে দেশৰ যুৱ শক্তিক উদ্যোগৰ কাৰণে প্ৰয়োজনীয় দক্ষতা প্ৰশিক্ষণ প্ৰদানৰ জৰিয়তে তেওঁলোকৰ বাবে এক উন্নত জীৱিকা সুনিশ্চিত কৰা। আজিৰ কাৰ্যসূচীত ডিব্ৰুগড়ৰ পৌৰসমিতিৰ অধ্যক্ষ ছোমা চক্ৰবৰ্তী, ফেবটেক্স লিমিটেডৰ সঞ্চালক ৰঞ্জিত গগৈ আদিও উপস্থিত আছিল।
