যোৱা ৭ মে’ৰ পৰা আৰম্ভ হোৱা ভাৰত-পাকিস্তানৰ সংঘাত শনিবাৰে হঠাৎ বন্ধ হোৱাৰ পাছত বহু প্ৰশ্নৰ উত্থাপন হৈছে। ভাৰতে ‘অপাৰেচন সিন্দূৰ’ চলাই থকাৰ সময়তে পাকিস্তানেও ভাৰতীয় সামৰিক ঘাটিত আক্ৰমণৰ চেষ্টা চলাইছিল। কিন্তু ভাৰতৰ শক্তিশালী নিৰাপত্তা বেষ্টনীয়ে পাকিস্তানৰ আক্ৰমণৰ সকলো অপচেষ্টা বিফল কৰি পেলালে। ইফালে শনিবাৰে ঘোষণা কৰা যুদ্ধবিৰতিৰ কৃতিত্ব লোৱাত আমেৰিকাও পিছ পৰি থকা নাই। এই সন্দৰ্ভত আন্তঃৰাষ্ট্ৰীয় সংবাদ মাধ্যম CNNএ এক দীঘলীয়া প্ৰতিবেদন প্ৰকাশ কৰিছে।
ইয়াৰ পূৰ্বে আমেৰিকাই দুয়োখন দেশৰ যুদ্ধৰ বিষয়ে “none of our business” বুলি কৈছিল যদিও কিন্তু এতিয়া আমেৰিকাই দাবী কৰিছে যে তেওঁলোকে দুয়োখন দেশৰ যুদ্ধৰ বিষয়ে চোৰাংচোৱাৰ গোপন তথ্য লাভ কৰিছিল আৰু শনিবাৰে নিশা দুয়োখন দেশৰ মাজত তীব্ৰ যুদ্ধৰ সম্ভাৱনা আছিল।
CNN-এ উল্লেখ কৰিছে যে, আমেৰিকাই কয় যে চোৰাংচোৱা সংস্থাই প্ৰকাশ কৰিছিল যে সপ্তাহৰ শেষৰ ফালে দুয়োখন দেশৰ মাজতে তীব্ৰ যুদ্ধ হ’ব পাৰে। উপ-ৰাষ্ট্ৰপতি জে ডি ভেন্স আৰু বৈদেশিক মন্ত্ৰী মাৰ্কো ৰুবিঅ’ই দুয়োখন দেশৰ মাজত চলি থকা যুদ্ধৰ ওপৰত চকু ৰাখিছিল। ভেন্সে কয় যে সপ্তাহৰ শেষৰ ফালে তীব্ৰ যুদ্ধৰ ভাবুকিৰ প্ৰতি লক্ষ্য ৰাখি তেওঁ প্ৰধানমন্ত্ৰী নৰেন্দ্ৰ মোদীৰ সৈতে ফোনযোগে কথা পাতি দুয়োখন দেশক যুদ্ধবিৰতিৰ দিশত আগবাঢ়ি যাবলৈ পতিয়ন নিয়াইছিল।
আমেৰিকাৰ বিষয়াসকলে কয় যে তেওঁলোকে লাভ কৰা চোৰাংচোৱাৰ গোপন তথ্যৰ ভিত্তিত সপ্তাহৰ শেষৰ ফালে দুয়োখন দেশৰ মাজত তীব্ৰ যুদ্ধ হোৱাৰ আশংকা আছিল। বিশেষকৈ যেতিয়া ভাৰতীয় ড্ৰ’নে পাকিস্তানৰ ৰাৱালপিণ্ডিত নূৰ খান এয়াৰবেছত আক্ৰমণ কৰিছিল। এই সামৰিক ঘাটিটো পাকিস্তানৰ পাৰমাণৱিক অস্ত্ৰৰ পহৰা দিয়া ষ্ট্ৰেটেজিক প্লেনছ ডিভিজনৰ মুখ্য কাৰ্যালয়ৰ ওচৰত অৱস্থিত আছিল। আমেৰিকাৰ এগৰাকী প্ৰাক্তন বিষয়াই কয় যে এই আক্ৰমণক পাকিস্তানৰ পাৰমাণৱিক কমাণ্ড কৰ্তৃপক্ষক লক্ষ্য কৰি লোৱাৰ সতৰ্কবাণী হিচাপে গণ্য কৰা হ’ব পাৰে, যাৰ ফলত পাৰমাণৱিক যুদ্ধৰ আশংকা বৃদ্ধি পাইছিল।
শুকুৰবাৰে বিয়লি (আমেৰিকাৰ সময় অনুসৰি) প্ৰধানমন্ত্ৰী মোদীৰ সৈতে কথা পাতিছিল উপ-ৰাষ্ট্ৰপতি ভেঞ্চে। পাকিস্তানৰ সৈতে পোনপটীয়াকৈ কথা পাতিবলৈ ভাৰতক বুজাই দিছিল। তেওঁ “অফ-ৰেম্প”ৰ প্ৰস্তাৱো আগবঢ়ায়। আমেৰিকাৰ মতে পাকিস্তানে এই কথা মানি ল’বলৈ সাজু আছিল। ভেঞ্চৰ নেতৃত্বত বিদেশ সচিব মাৰ্কো ৰুবিঅ’ই দুয়োখন দেশৰ বৈদেশিক সচিবৰ সৈতে গোটেই নিশা আলোচনাত মিলিত হয়। চুক্তিখনৰ খচৰা প্ৰস্তুত কৰাত ট্ৰাম্প প্ৰশাসনে অংশগ্ৰহণ কৰা নাছিল যদিও ইয়াৰ মূল ভূমিকা আছিল দুয়োপক্ষক আলোচনাৰ মেজলৈ অনা।
শনিবাৰে ভাৰত আৰু পাকিস্তানে সম্পূৰ্ণ আৰু তাৎক্ষণিক যুদ্ধবিৰতি ঘোষণা কৰে। ড’নাল্ড ট্ৰাম্পে নিজকে ক্ৰেডিট দিবলৈ আৰম্ভ কৰিলে যে কেৱল তেওঁৰ মধ্যস্থতাৰ বাবেই এইটো সম্ভৱ হৈছে। অৱশ্যে প্ৰত্যক্ষভাৱে নহয় যদিও ভাৰতে এই দাবী নাকচ কৰিছে। ভাৰতৰ মতে এয়া আছিল দুয়োখন দেশৰ মাজত হোৱা “প্ৰত্যক্ষ চুক্তি”। একে সময়তে যুদ্ধবিৰতিৰ পাছত আমেৰিকাক ধন্যবাদ দি পাকিস্তানৰ প্ৰধানমন্ত্ৰীও ত্ৰুটি ৰখা নাছিল। কিন্তু যুদ্ধবিৰতিৰ ৩ ঘণ্টাৰ পাছতে কাশ্মীৰত বিশেষকৈ বৈষ্ণো দেৱীৰ ওপৰত ড্ৰ’ন আক্ৰমণ সংঘটিত কৰে। অৱশ্যে ভাৰতে ইয়াৰো যোগ্য প্ৰত্যুত্তৰ দিয়ে।
বৃহস্পতিবাৰে ফক্স নিউজৰ সৈতে হোৱা এক সাক্ষাৎকাৰত মাৰ্কিন উপ-ৰাষ্ট্ৰপতি ভেঞ্চে কয় যে, “এই সংঘাত মৌলিকভাৱে আমাৰ বিষয় নহয়। আমেৰিকাই দুয়োখন দেশকে অস্ত্ৰ-শস্ত্ৰ এৰি দিবলৈ বাধ্য কৰিব নোৱাৰে। কিন্তু চোৰাংচোৱা আৰু পাৰমাণৱিক যুদ্ধৰ আশংকাই ট্ৰাম্প প্ৰশাসনক সক্ৰিয় ভূমিকা ল’বলৈ বাধ্য কৰাইছিল। যোৱা মাহত ভাৰত ভ্ৰমণৰ সময়ত ভেঞ্চে প্ৰধানমন্ত্ৰী মোদীক লগ পাইছিল। এই সংকটত এই সম্পৰ্ক সহায়ক বুলি প্ৰমাণিত হ’ব বুলি ট্ৰাম্প প্ৰশাসনে বিশ্বাস কৰিছিল।”
