বুধবাৰে ডিব্ৰুগড়ৰ গ্ৰাহাম বজাৰ ডাকঘৰত সাংসদ ৰামেশ্বৰ তেলীয়ে ডাকঘৰ পাৰপত্ৰ সেৱা মুকলি কৰে।
ডিব্ৰুগড় আৱৰ্তভৱনৰ সমীপৰ গ্ৰাহাম বজাৰ ডাকঘৰত মুকলি কৰা পাৰপত্ৰ সেৱা কেন্দ্ৰটোৱে জিলাখনৰ নাগৰিকক পাৰপত্ৰ সম্পৰ্কীয় সকলো ধৰণৰ সেৱা যোগান ধৰিব।
শিলচৰ আৰু মঙলদৈত স্থাপন কৰা পাৰপত্ৰ সেৱা কেন্দ্ৰৰ পিছত ডিব্ৰুগড় পাৰপত্ৰ সেৱা কেন্দ্ৰটো বৈদেশিক পৰিক্ৰমা মন্ত্ৰ্যালয় আৰু ডাক বিভাগৰ সহযোগত স্থাপন কৰা তৃতীয়টো পাৰপত্ৰ সেৱা কেন্দ্ৰ।
ডাকঘৰ পাৰপত্ৰ সেৱা কেন্দ্ৰৰ পাৰপত্ৰ বিষয়া আকাশদ্বীপ চক্ৰবতীয়ে কয় যে এই পাৰপত্ৰ কেন্দ্ৰটোৱে দিনটোত ৫০ জন ব্যক্তিক পাৰপাত্ৰ সম্পৰ্কীয় সেৱা প্ৰদান কৰিব পাৰিব। লগতে আৰু তেওঁ নতুন পাৰপত্ৰ বনোৱা আৰু পাৰপত্ৰ নৱীকৰণ সম্পৰ্কীয় সেৱাও প্ৰদান কৰা হ’ব বুলিও কয়।
অনুষ্ঠানটোত চক্ৰবৰ্তীয়ে কয় যে পূৰ্বতে পাৰপত্ৰ সম্পৰ্কীয় কোনো কামৰ বাবে ডিব্ৰুগড়বাসী গুৱাহাটীলৈ যাব লগা হৈছিল যদিও এতিয়াৰে পৰা ডিব্ৰুগড়তে সেই সুবিধা লাভ কৰিব পাৰিব। কেৱল ততকাল পাছপৰ্ট আৰু কুনৈতিক পাছপ’ৰ্টহে ডিবব্ৰুগড়ত উপলব্ধ নহ’ব। লগতে পাৰপত্ৰ আৱেদনকাৰীয়ে আৱেদন কৰা তিনি সপ্তাহতকৈও কম সময়ৰ ভিতৰতে পাৰপত্ৰ লাভ কৰিব।
আনহাতে অনুষ্ঠানত উপস্থিত থকা ৰামেশ্বৰ তেলীয়ে শেহতীয়াকৈ বৈদেশিক পৰিক্ৰমা মন্ত্ৰী সুষমা স্বৰাজক উত্তৰ-পূৰ্বাঞ্চলৰ ৰাইজৰ সুবিধাৰ্থে গুৱাহাটীত এটা ভিছা সেৱা কেন্দ্ৰ মুকলি কৰিবলৈ অনুৰোধ জনাইছিল। আৰু বৈদেশিক মন্ত্ৰী সুষমা স্বৰাজে কোনো ভাৰতীয়ই তেওঁলোকৰ পাৰপত্ৰৰ বাবে ৫০ কি. মি.ত কৈ আঁতৰলৈ যাব নোৱাৰিব বুলি কৈছিল।
তেলীয়ে কয় যে ডিব্ৰুগড়বাসী এতিয়া পাৰপত্ৰৰ বাবে গুৱাহাটীলৈ যোৱাৰ কোনো প্ৰয়োজন নাই কাৰণ এতিয়াৰে পৰা ডিব্ৰুগড়তে পাৰপত্ৰৰ বাবে আৱেদন কৰিব পাৰিব।
উদ্বোধনী অনুষ্ঠানটোত আঞ্চলিক পাৰপত্ৰ বিষয়া লবছাং ছেৰিং, বিব্ৰুগড় বিধায়ক প্ৰশান্ত ফুকন, লাহোৱালৰ বিধায়ক ঋতুপৰ্ণ বৰুৱা, সোণোৱাল কছাৰী স্বায়ত্ত শাসিত পৰিষদৰ মুখ্য কাৰ্যবাহী বিষয়া দিপুৰঞ্জন মাক্ৰাৰাৰী আৰু ডিব্ৰুগড় পৌৰসভাৰ অধ্যক্ষ সোমা চক্ৰবৰ্তী উপস্থিত থাকে।
