বুলেটপ্ৰূফ জেকেট ভেদি আলফাৰ গুলীত প্ৰাণ হেৰুওৱা অ’চি ভাস্কৰ কলিতাৰ শোকত সকলো ম্ৰিয়মাণ হৈ থকাৰ মাজতে এক চাঞ্চল্যকৰ মন্তব্য কৰিছে শক্তি বিভাগৰ মন্ত্ৰী তপন গগৈয়ে।
দেওবাৰে এই সন্দৰ্ভত মন্ত্ৰী গৰাকীয়ে নিজৰ প্ৰতিক্ৰিয়া ব্যক্ত কৰি কয় যে তদন্ত প্ৰক্ৰিয়াত ওলাই পৰিব বুলেটপ্ৰূফ জেকেটত থকা আঁসোৱাহ। আনহাতে কংগ্ৰেছৰ দিনত ক্ৰয় কৰা বুলেটপ্ৰূফ জেকেটৰ বাবে কোন দায়ী সেয়াও তদন্তত প্ৰকাশ পাব বুলি সদৰী কৰে মন্ত্ৰী গৰাকীয়ে।
যি সময়ত ভাস্কৰ কলিতাৰ মৃত্যুক লৈ ৰাজ্যবাসী শোকস্তব্ধ হৈ আছে তেনে সময়তে সোণোৱাল মন্ত্ৰীসভাত নতুনকৈ অন্তৰ্ভুক্ত মন্ত্ৰী তপন গগৈৰ মন্তব্যই সৃষ্টি কৰিছে ৰাজনৈতিক প্ৰতিক্ৰিয়াৰ।মন্ত্ৰী হৈয়ে বোকা ছটিওৱাৰ ৰাজনীতি আৰম্ভ কৰিছে বুলি প্ৰকাশ কৰিছে একাংশ লোকে।
উল্লেখযোগ্য যে যোৱা শুকুৰবাৰে বিয়লি প্ৰায় ৩ বজাত তিনিচুকীয়া জিলাৰ বৰডুমচা থানাৰ অৰ্ন্তগত খজুৱা পথাৰত উগ্ৰপন্থীৰ বিৰুদ্ধে অভিযান চলাবলৈ গৈ শ্বহীদ হৈছিল বৰডুমছা থানাৰ ভাৰপ্ৰাপ্ত আৰক্ষী বিষয়া ভাস্কৰ কলিতা। আলফা স্বাধীনৰ সদস্য উদয় অসমৰ নেতৃত্বত বাহৰ পাতি থকা দলৰ সৈতে হোৱা মুখামুখি সংঘৰ্ষৰ পৰিণতিত মৃত্যুক আকোঁৱালি লৈছিল দক্ষ আৰক্ষী বিষয়া ভাস্কৰ কলিতাই।
এক সূত্ৰৰ মতে সংঘৰ্ষৰ সময়ত সাহসী আৰক্ষী বিষয়া ভাস্কৰ কলিতাই বুলেটপ্ৰূফ জেকেট পৰিধান কৰি আছিল। কিন্তু এই বুলেটপ্ৰূফ জেকেট ভেদি আলফাৰ গুলীয়ে প্ৰাণ ল’লে ভাস্কৰ কলিতাৰ।
