ত্ৰিপুৰা বিধানসভা নিৰ্বাচনক বিশেষ গুৰুত্বসহ লৈছে বিজেপিয়ে। মাত্ৰ ৬০ খন বিধানসভাৰ আসন থকা এখন সৰু ৰাজ্য হ’লেও বাওঁ দলৰ হাতত থকা ৰাজ্যখন নিজৰ দখললৈ আনিবলৈ গেৰুৱা দলটোৱে উঠি-পৰি লাগিছে। কালি ত্ৰিপুৰাৰ নিৰ্বাচন সম্পৰ্কীয় গুৰুত্বপূৰ্ণ দিশৰ আলোচনা কৰিবলৈ নতুন দিল্লীত দলৰ সভাপতি অমিত শ্বাহ আৰু প্ৰধান মন্ত্ৰী নৰেন্দ্ৰ মোদী, গৃহ মন্ত্ৰী ৰাজনাথ সিং, বিত্ত মন্ত্ৰী অৰুণ জেটলি, বৈদেশিক পৰিক্ৰমা মন্ত্ৰী সুষমা স্বৰাজকে আদি কৰি বাঘা বাঘা নেতাসকল এক গুৰুত্বপূৰ্ণ বৈঠকত মিলিত হয়। ইয়াৰ পৰাই দলটোৱে যে ৰাজ্যখনৰ নিৰ্বাচনক স্বাভাৱিকতকৈ অধিক গুৰুত্ব দিছে তাৰ অনুমান কৰিব পাৰি।
ইতিমধ্যে বাওঁ দলক ওফৰোৱাৰ কৌশল হিচাপে বিজেপিয়ে ৰাজ্যখনত দুটা গুৰুত্বপূৰ্ণ পদক্ষেপ লৈছে। এটা হ’ল সুকীয়া তিপৰালেণ্ড দাবী কৰি থকা আই পি এফ টিৰ সৈতে নিৰ্বাচনী মিত্ৰতা স্থাপন কৰা আৰু আনটো হ’ল নিৰ্বাচনী ৰাজনীতিত অত্যন্ত কৌশলী তথা নেতা বেচা-কিনাত সিদ্ধহস্ত ড০ হিমন্ত বিশ্ব শৰ্মাক ৰাজ্যখনৰ নিৰ্বাচনী দায়িত্ব দিয়া।
আনহাতে এই বৈঠকৰ পিছতে দলটোৰ কেন্দ্ৰীয় নিৰ্বাচন কমিটিয়ে নতুন দিল্লীত ত্ৰিপুৰা বিধানসভা নিৰ্বাচনৰ বাবে মুঠ ৪৪ টা সমষ্টিৰ প্ৰাৰ্থীৰ তালিকা প্ৰকাশ কৰিছে। এই তালিকা ঘোষণা কৰে কেন্দ্ৰীয় নিৰ্বাচন কমিটিৰ সচিব জে পি নন্দই। তালিকাখনত ৰাজ্যখনত দলটোৰ বৰ্তমানৰ ৭জন বিধায়কৰ নাম অন্তৰ্ভুক্ত হোৱাৰ লগতে দুজন প্ৰাক্তন বিধায়কৰ নামো সোমাইছে। প্ৰাক্তন বিধায়কৰ মাজত আছে পূৰ্বতে কংগ্ৰেছ দলত থকা আৰু তাৰ পিছত তৃণমূল কংগ্ৰেছলৈ দল সলনি কৰি মাণিক সৰকাৰৰ চৰকাৰত মন্ত্ৰীত্ব লাভ কৰা সুৰজিত দত্তৰ নাম। এওঁ যোৱা বছৰ বিজেপিত যোগদান কৰিছিল। আনহাতে আনজন হ’ল কমলপুৰ সমষ্টিৰ পৰা কংগ্ৰেছক প্ৰতিনিধিত্ব কৰা মনোজকান্তি দেব, যিজনে যোৱা বছৰ বিজেপিত যোগদান কৰিছিল। এওঁলোকৰ লগতে যোৱাবছৰ তৃণমূল কংগ্ৰেছৰ নেতৃত্বই দলৰ পৰা বহিষ্কাৰ কৰা ছজন বিধায়কৰ নামো আছে, যিকেইজনে নিলম্বিত হোৱাৰ পিছত বিজেপিত যোগদান কৰিছিল।
উল্লেখযোগ্য যে ইয়াৰ পূৰ্বে ৰাজ্যখনত দলৰ নিৰ্বাচনী দায়িত্বত থকা ড০ হিমন্ত বিশ্ব শৰ্মাই আসন ভাগ বাটোৱাৰাৰ বাবে আই পি এফ টিৰ নেতাসকলৰ সৈতে বৈঠকত মিলিত হৈছিল। বিজেপিয়ে ৰাজ্যখনত আই পি এফ টিৰ উপৰি আন সকলো সৰু সৰু ৰাজনৈতিক দলৰ সৈতে নিৰ্বাচনী মিত্ৰতা বা বুজাবুজি কৰিছে।
আনহাতে জানিব পৰামতে কংগ্ৰেছে ৰাজ্যখনৰ বিধানসভাৰ নিৰ্বাচনত ৫৭ টা সমষ্টিত প্ৰাৰ্থী দিব।
ৰাজ্যখনত অহা ১৮ ফেব্ৰুৱাৰিত নিৰ্বাচন অনুষ্ঠিত হ’ব। উত্তৰ-পূৰ্বাঞ্চলৰ আন দুখন ৰাজ্য ক্ৰমে মেঘালয় আৰু নাগালেণ্ডত নিৰ্বাচন হ’ব অহা ২৭ ফেব্ৰুৱাৰিত। তিনিওখন ৰাজ্যৰে ভোট গণনা হ’ব মাৰ্চৰ ৩ তাৰিখে।
