থাইলেণ্ডত অনুষ্ঠিত হোৱা ষ্টুডেণ্টছ অলিম্পিক এছিয়ান গেমছত ত্ৰিপুৰা জনজাতি এলেকা স্বায়ত্ব শাসিত জিলা পৰিষদৰ ফুটবল দলটোৱে পাকিস্তানৰ দলটোক পৰাস্ত কৰিছে।
ঘৰুৱা থাইলেণ্ড দলটোৰ উপৰিও এই টু্নামেণ্টখনত ভাৰত, পাকিস্তান আৰু বাংলাদেশে অংশগ্ৰহণ কৰিছিল।
ত্ৰিপুৰা জনজাতি এলেকা স্বায়ত্ব শাসিত জিলা পৰিষদৰ ক্ৰীড়া আৰু যুৱ পৰিক্ৰমা বিভাগৰ কাৰ্যবাহী সদস্য পৰিক্ষিত মুৰাসিঙে আগৰতলা ৰেলৱে ষ্টেশ্যনত ছাত্ৰ ফুটবল দলটোক আদৰণি জনায়। এই দলটো এতিয়া সমগ্ৰ এছিয়াতে সৰ্বোৎকৃষ্ট ফুটবল দল হিচাপে পৰিগণিত হৈছে।
উল্লেখ্য যে ১৭ অনূৰ্ধ্বৰ এই দলটোত অধিকাংশ খেলুৱৈয়েই ত্ৰিপুৰাৰ। দলটোত হাৰিয়ানা আৰু দিল্লীৰ পৰা ৩ জনকৈ খেলুৱৈ সন্নিৱিষ্ট আছে। ক্ষিপুৰাৰ ছাত্ৰৰ ফুটবল দলটোৱে থাইলেণ্ডৰ পাট্টায়াত অনুষ্ঠিত প্ৰতিযোগিতাখনত পাকিস্তানক ৩-০ গ’লৰ ব্যৱধানত পৰাস্ত কৰিছিল।
ইয়াৰ পূৰ্বে দলটোৱে কোৱাৰ্টাৰ ফাইনেলত বাংলাদেশক আৰু ছেমি ফাইনেলত থাইলেণ্ডক ৭-০ৰ ব্যৱধানত পৰাস্ত কৰিছিল।
ত্ৰিপুৰা দলটোৰ কেপ্টেইন হৈছে উজ্জল দেববাৰ্মা আৰু ব্যৱস্থাপক হৈছে অনীল শৰ্মা।
স্মৰ্তব্য যে ইয়াৰ পূৰ্বে ত্ৰিপুৰা জনজাতি এলেকা স্বায়ত্ব শাসিত জিলা পৰিষদৰ ফুটবল দলটোৱে মণিপুৰ দলটোক পৰাস্ত কৰি চেম্পিয়ন হৈছিল।
অহা ৬ আগষ্টত নুৱাইৰ খুমুলৱাং প্ৰেক্ষাগৃহত এটা সম্বৰ্ধনা অনুষ্ঠান পাতি ত্ৰিপুৰা জনজাতি এলেকা স্বায়ত্ব শাসিত জিলা পৰিষদৰ ক্ৰীড়া আৰু যুৱ পৰিক্ৰমা বিভাগৰ তৰফৰ পৰা ফুটবল দলটোক সম্বৰ্ধনা জনোৱা হ’ব।
