বহিৰাগত বণিকগোষ্ঠীক দিবলৈ অসমৰ খিলঞ্জীয়া জনগণৰ পৰা ভূমিৰ অধিকাৰ কাঢ়ি লৈছে বিজেপি নেতৃতাধীন চৰকাখনে। এইবাৰ আদানী গ্রুপক বিটিআৰৰ অন্তৰ্গত পৰ্বতঝৰাত থাৰ্মেল পাওৱাৰ প্ৰকল্প নিৰ্মাণৰ বাবে শ শ বিঘা মাটি গতাই দিবলৈ ওলাইছে অসম চৰকাৰে। ইয়াকে কেন্দ্ৰ কৰি স্থানীয় খিলঞ্জীয়া ৰাইজ আৰু প্ৰশাসনৰ মাজত সংঘাতৰ সৃষ্টি হৈছে। চৰকাৰ এই কাণ্ডক তীব্ৰ গৰিহণা দিছে সদৌ বড়ো ছাত্ৰ সন্থাই।
আজি চিৰাং জিলাৰ বিজনীৰ বড়ো লাওগাঁও খেলপথাৰত কেন্দ্ৰীয়ভাবে অনুষ্ঠিত কৰা বড়ো আন্দোলনৰ প্ৰথম শ্বহীদ সুজিত নাৰ্জাৰীৰ শ্বহীদ দিৱসত অংশগ্ৰহণ কৰি বড়ো ছাত্ৰ সন্থা চমুকৈ এবছুৰ কেন্দ্ৰীয় সভাপতি দ্বীপেন বড়োৱে সাংবাদিকৰ আগত কয় যে বড়ো ৰাইজক দমন কৰি ভয় ভাবুকিৰে ভূমি অধিগ্ৰহণ কৰা কাৰ্য্যৰ পৰা বিৰত থাকক। এই প্ৰকল্প স্থাপনৰ কৰিবলৈ যাওঁতে ৰাইজৰ আবেগ আৰু অধিকাৰৰ কথা বিবেচনা কৰি চাব লাগিব।
বিষয়টো আলাপ আলোচনাৰ মাজেৰে সমাধান কৰিব লাগিব বুলি প্ৰকাশ কৰি এবছু ৰাইজৰ লগত থাকি সমস্যা সমাধান কৰিব বুলি বড়োৱে কয়।
ইফালে বিটিআৰত অঞ্জলী দৈমাৰীৰ নেতৃত্বত নতুন ৰাজনৈতিক দল গঠনৰ সন্দৰ্ভত দ্বীপেন বড়োৱে কয় যে ৰাজনৈতিক দল গঠনৰ অধিকাৰ সকলৰে আছে। কিন্ত এয়াও ঠিক যে একেটা অঞ্চলৰ এটা জনগোষ্ঠীৰ পৰা তিনিটা ৰাজনৈতিক দল থাকিলে আমি কৰবাত নহয় কৰবাত উজুটি খাব লাগিব। ই আমাক অধিকাৰ দিয়াৰ সলনি ক্ষতি হে কৰিব। গতিকে প্ৰতিটো দলৰ নেতৃত্বই ইয়াৰ ওপৰত বিবেচনা কৰি অঞ্চলটোৰ স্বাৰ্থত চিন্তা কৰিব লাগে।তেওঁ কয় এবছুৱে বড়ো জনগোষ্ঠীৰ স্বাৰ্থত বিপিএফ আৰু ইউ পি পি এল দুয়োটা দল মিত্ৰতাৰে আগবাঢ়িবলৈ প্ৰচেষ্টা চলাই আহিছে। বড়ো আন্দোলনৰ পটভূমিত বড়ো আঞ্চলিক ৰাজনৈতিক দল গঠন হৈছিল। যদিও এবছুৰ কোনো ৰাজনৈতিক এজেণ্ডা নাই কিন্তু চুক্তি ৰূপায়ন কৰাটো আমাৰ মূল এজেণ্ডা। সেয়ে এতিয়া দুই দল নহয় ! তিনিওটা ৰাজনৈতিক দলৰ মাজত যদি বুজাবুজি হয় আমি অতিকে আনন্দিত হম বুলি কয় দ্বীপেন বড়োৱে।
