ছিকিমৰ মুখ্যমন্ত্ৰী পৱন কুমাৰ চামলিঙে শনিবাৰে সন্ধিয়া প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী ৰাজনাথ সিঙক নতুন দিল্লীত তেওঁলোকৰ সংশ্লিষ্ট বাসভৱনত সাক্ষাৎ কৰে।
চামলিঙে ছিকিমৰ বৰ্তমান পৰিস্থিতি সম্পৰ্কে প্ৰধান মন্ত্ৰী আৰু গৃহমন্ত্ৰীগৰাকীক অৱগত কৰে। এক চৰকাৰী সূত্ৰই এই কথা প্ৰকাশ কৰিছে।
অহা বছৰ অনুষ্ঠিত হ’বলগীয়া বিধানসভাৰ নিৰ্বাচনৰ প্ৰতি লক্ষ্য ৰাখি ছিকিমৰ লিম্বু আৰু তামাং সম্প্ৰদায়ৰ বাবে বিধানসভাৰ দুখন আসনৰ সংৰক্ষণত অনুমোদন জনোৱাটো গুৰুত্বপূৰ্ণ তথা জৰুৰী বুলি তেওঁ অৱগত কৰে।
ছিকিমৰ জনসংখ্যাৰ ৩৩ শতাংশ লোক লিম্বু আৰু তামাং সম্প্ৰদায়ৰ আৰু প্ৰায় এক দশক ধৰি তেওঁলোকৰ বাবে আসন সংৰক্ষণৰ দাবীটো ৰাজ্যখনত উত্থাপিত হৈ আহিছে।
শাসকীয় ছিকিম গণতান্ত্ৰিক মৰ্চাৰ নেতা চামলিঙে বিগত দুটাকৈ বিধানসভাৰ নিৰ্বাচনত লিম্বু আৰু তামাং সকলৰ বাবে সংৰক্ষণ আগবঢ়োৱাৰ প্ৰতিশ্ৰুতি দিছিল যদিও সেয়া পূৰণ কৰাত ব্যৰ্থ হৈছে।
তেওঁ লগতে প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী ৰাজনাথ সিঙক সপ্তদশ গিয়ালাৱা কৰ্মপা অ’জিয়েন থ্ৰিনলে দৰ্জীক ছিকিম ভ্ৰমণৰ অনুমতি দিবলৈ আহ্বান জনায়। সপ্তদশ কৰ্মপাগৰাকী হৈছে তিব্বতীয় বৌদ্ধধৰ্মীসকলৰ ৯০০ বছৰ পুৰণি ঠালৰ মুৰব্বী।
কেইবছৰ ধৰি কৰ্মপাগৰাকীৰ ছিকিম ভ্ৰমণৰ বিষয়টো তিব্বতীয় বৌদ্ধ ধৰ্মগৰাকীৰ সৈতে ওলমি আছে। কিন্তু কেন্দ্ৰই ভাৰত-চীন সম্পৰ্কৰ কথা মনত ৰাখি আধ্যাত্মিক নেতাগৰাকীক ভ্ৰমণৰ অনুমতি দিয়া নাছিল।
প্ৰধানমন্ত্ৰী আৰু গৃহমন্ত্ৰী দুয়োগৰাকীয়ে মুখ্যমন্ত্ৰী চামলিঙে জনোৱা অনুৰোধৰ প্ৰশংসা কৰে আৰু ইতিবাচক সঁহাৰি দিয়ে বুলি চৰকাৰী সূত্ৰটোৱে জানিবলৈ দিছে।
