ভৈয়াম জনজাতি অধ্যুষিত এলেকাত বাস কৰা জনজাতীয় লোকৰ আয় বৃদ্ধিৰ লক্ষ্যৰে চৰকাৰে আগ বঢ়োৱা ‘জনজাতি উপ-পৰিকল্পনালৈ বিশেষ কেন্দ্ৰীয় অনুদান’ (এছ চি এ টু টি এছ পি) শিতানৰ পুঁজিৰে পশুপালন আৰু পশু চিকিৎসা সঞ্চালকালয়ে ঠিকাদাৰৰ জৰিয়তে মাজুলীত ৰূপায়ণ কৰা একাধিক ক্ষুদ্ৰ গাহৰিপাম নিৰ্মাণ আঁচনিৰ নিৰ্মাণকাৰ্যত ব্যাপক অনিয়ম হোৱাৰ অভিযোগ উত্থাপিত হৈ আহিছে। এই ৰাজহুৱা অভিযোগক গুৰুত্বসহকাৰে লৈ জিলা প্ৰশাসনে ৫ এপ্ৰিলত এক অনুসন্ধানমূলক তদন্ত কৰে জিলাখনৰ অতিৰিক্ত উপায়ুক্ত তথা অতিৰিক্ত জিলা দণ্ডাধীশ চিন্ময় নাথে।
অতিৰিক্ত উপায়ুক্তজনে ৫ এপ্ৰিলত উজনি মাজুলীৰ জেংৰাইমুখ আৰু কাৰ্কিচুকত আঁচনিখনৰ অধীনত নিৰ্মীয়মাণ দুটা আত্মসহায়ক গোটৰ ক্ষুদ্ৰ গাহৰিপাম পৰিদৰ্শন কৰি নিৰ্মাণ কাৰ্যত ব্যৱহৃত সামগ্ৰীৰ নিজে চৰজমিন তদন্ত কৰে। প্ৰথমে জেংৰাইমুখৰ কেঁচাইখাইতী গাঁৱত নিৰ্মাণ কৰি থকা কেঁচাইখাইতী মহিলা আত্মসহায়ক গোটৰ ক্ষুদ্ৰ গাহৰি পামৰ নিৰ্মাণ কাৰ্য পৰিদৰ্শন কৰে। এই পৰিদৰ্শনকালত অতিৰিক্ত উপায়ুক্তগৰাকীয়ে পামটোৰ নিৰ্মাণ কাৰ্যত ঠিকাদাৰে অতি নিম্নমানৰ টিনপাটকে ধৰি অন্যান্য নিৰ্মাণ সামগ্ৰী ব্যৱহাৰ কৰা দেখি হতভম্ব হৈ পৰে।
ক্ষুব্ধ অতিৰিক্ত উপায়ুক্ত শ্ৰীনাথে ঠিকাদাৰৰ হৈ কাম তদাৰক কৰা স্থানীয় তত্ত্বাৱধায়কক এই সন্দৰ্ভত তাৎক্ষণিকভাৱে কৈফিয়ৎ তলব কৰাৰ লগতে নিৰ্মাণ কাৰ্যত ব্যৱহাৰ কৰা অতি নিম্নমানৰ টিনপাটৰ প্ৰমাণ স্বৰূপে এখন টিনপাট জব্দ কৰে। অতিৰিক্ত উপায়ুক্তগৰাকীয়ে ঠিকাদাৰক আগন্তুক ৭ দিনৰ ভিতৰতে টিনপাটসহ সকলো নিম্নমানৰ সামগ্ৰী আঁতৰাই আঁচনিখনৰ প্ৰাক্কলনত নিৰ্দিষ্ট উন্নত মানৰ সামগ্ৰী ব্যৱহাৰ কৰি এই ক্ষুদ্ৰ গাহৰিপামটোৰ নিৰ্মাণকাৰ্য সম্পূৰ্ণ কৰাৰ সময়সীমা বান্ধি দিয়ে।
অন্যথা এই অনিয়ম আৰু নিম্নমানৰ কামৰ বাবে ঠিকাদাৰৰ বিৰুদ্ধে তাৎক্ষণিকভাৱে এজাহাৰ দাখিল কৰি আইনী ব্যৱস্থা গ্ৰহণ কৰাৰ কঠোৰ সতৰ্কবাণী শুনায় অতিৰিক্ত উপায়ুক্তগৰাকীয়ে।
ইয়াৰ পাছতে অতিৰিক্ত উপায়ুক্তগৰাকীয়ে ফুলনিৰ কাৰ্কিচুক গাঁৱতো এছ চি এ টু টি এছ পি শিতানৰ পুঁজিৰে নিৰ্মাণ কৰি থকা লেঃবাং আত্মসহায়ক গোটৰ ক্ষুদ্ৰ গাহৰি পামৰ নিৰ্মাণ কাৰ্য পৰিদৰ্শন কৰি আত্মসহায়ক গোটৰ সদস্য আৰু স্থানীয় লোকৰ পৰা নিৰ্মাণৰ মান সন্দৰ্ভত মতামত গ্ৰহণ কৰে।
অতিৰিক্ত উপায়ুক্তজনে একেদিনাই গড়মূৰ (চিতাদাৰচুক)-জেংৰাইমুখ সংযোগী গড়কাপ্তানী পথটোত চলি থকা পুনৰ মেৰামতি কাৰ্যৰো আকস্মিক পৰিদৰ্শন কৰে। জেংৰাইমুখ-ফুলনি অংশত নিৰ্মাণ কাৰ্য পৰিদৰ্শন কৰি অতিৰিক্ত উপায়ুক্তগৰাকীয়ে বিভাগীয় ঠিকাদাৰক কামৰ লেহেমীয়া গতি আৰু নিম্ন মানক লৈ সকিয়নী দিয়ে। উল্লেখযোগ্য যে এই পথটো যাতায়ত উপয়োগী কৰি তুলিবলৈ প্ৰায় ৪.৬২ কোটি টকা ব্যয়সাপেক্ষে গড়কাপ্তানী (গ্ৰাম্য পথ) বিভাগৰ অধীনত শিল-বালিৰে খলা-বমা গাঁত পুতি ‘কাৰ্পেটিং পিট্চ’সহ পুনৰ মেৰামতিৰ ব্যৱস্থা কৰা হৈছে।
কিন্ত ২০ কিলোমিটাৰ দৈৰ্ঘ্যৰ পথটোৰ এই পুনৰ মেৰামতি কাৰ্যত মাথো ১০-১২ জনমানহে শ্ৰমিক নিয়োজিত কৰাৰ বাবেই কাম অতি লেহেমীয়া গতিত আগ বাঢ়িছে। এনে অৱস্থাত অতিৰিক্ত উপায়ুক্ত নাথে এসপ্তাহৰ ভিতৰতে কমেও ৪০জন শ্ৰমিকক দৈনিক নিয়োজিত কৰি নিৰ্মাণ কাৰ্য ক্ষিপ্ৰ কৰি তুলিবলৈ ঠিকাদাৰক নিৰ্দেশ দিয়ে।
