অসমৰ এগৰাকী সুখ্যাত লোকসংগীত শিল্পী কল্পনা পাটোৱাৰীয়ে অষ্ট্ৰেলিয়াৰ কুন্সছলেণ্ডত হ’ব লগীয়া আগন্তুক কমনৱেল্থ গেইমছৰ সামৰণি অনুষ্ঠানত অনুষ্ঠান পৰিৱেশন কৰাৰ গৌৰৱ অৰ্জনৰ সুযোগ পাইছে। ভোজপুৰী সংগীত জগতৰ সামাজ্ঞী হিচাপে অধিক পৰিচিত অসমৰ শিল্পীগৰাকীৰ এই বিৰল কৃতিত্বই স্বাভাৱিকতে উৎফুল্ল কৰিছে তেওঁৰ অনুৰাগী তথা অসমৰ ৰাইজক।
এই সামৰণি অনুষ্ঠানৰ কাৰ্য্যসূচীটো আছে অহা ১৫ এপ্ৰিলত।
‘কমনৱেল্থ গেইমছৰ সামৰণি অনুষ্ঠানত মই ভাৰতক প্ৰতিনিধিত্ব কৰিম বুলি যেতিয়া খবৰটো পাওঁ মই আচৰিত হৈ গৈছিলো। এটাই প্ৰশ্ন চিধাই মনলৈ আহিছিল- কিয় মোক ইমান ডাঙৰ অনুষ্ঠান এটাৰ বাবে বাছনি কৰা হ’ল। মইতো এগৰাকী সাধাৰণ ভোজপুৰী গায়িকা।’ এইদৰে নিজৰ বিনম্ৰ প্ৰতিক্ৰিয়া প্ৰকাশ কৰে শিল্পীগৰাকীয়ে।
‘এগৰাকী ভোজপুৰী গায়িকা হিচাপে, এজন লোকসংগীত শিল্পী হিচাপে মোৰ বাবে এইটো এটা ডাঙৰ সন্মান।’ এইদৰে কয় কল্পনাই।
উল্লেখযোগ্য যে অসমৰ বৰপেটা অঞ্চলৰ এই ব্যতিক্ৰমী লোকসংগীত শিল্পীগৰাকী ভোজপুৰী সংগীত তথা চিনেমা জগতত খুবেই জনপ্ৰিয়। তেওঁ বহুতো ভোজপুৰী চিনেমাত কণ্ঠদান কৰাৰ উপৰি অসমীয়া বেংগলী, হিন্দী, তামিল, মাৰাথী আদি ভাষাৰ চিনেমাতো কণ্ঠদান কৰিছে।
আনহাতে তেওঁ যোৱা ২০১৪ চনৰ পৰা তেওঁ বলিউদৰ সংগীত জগততো কাম কৰি আছে। ১৯৭৮ ত বৰপেটাৰ সৰভোগত জন্মগ্ৰহণ কৰা শিল্পীগৰাকীয়ে ঐতিহাসিক কটন মহাবিদ্যালয়ৰ পৰা স্নাতক ডিগ্ৰী লোৱাৰ লগতে লক্ষ্ণৌৰ পৰা ধ্ৰুপদী সংগীতত বিশাৰদৰ ডিগ্ৰীও লৈছে।
