শোণিতপুৰ জিলাৰ ঢেকিয়াজুলি আৰক্ষী থানাৰ অন্তৰ্গত বাতাসীপুৰত অলপতে সংঘটিত হোৱা ধৰ্ষণৰ ঘটনাত অভিযুক্তক সংশ্লিষ্ট সংস্থাই ৰক্ষাবেক্ষণ দিয়াৰ অভিযোগ তুলি অঞ্চলটোৰ ৰাইজ আৰু নিখিল বড়ো ছাত্ৰ সন্থাই (এবছু) তীব্ৰ প্ৰতিক্ৰিয়া প্ৰকাশ কৰিছে। সমাজৰ সকলো শ্ৰেণীৰ লোকৰ মাজত সজাগতা সৃষ্টিৰ এক প্ৰয়াসেৰে বাতাসীপুৰত আজি সকলো সমবেত হৈছিল।
এবছুৰ জিলা সম্পাদক এবিট নাৰ্জাৰীয়ে কয় যে অভিযোগ অনুসৰি অঞ্চলটোৰ এগৰাকী ১৬ বছৰীয়া ছোৱালীক ঢেকিয়াজুলি ৰোড ৰে’ল ষ্টেশ্যনৰ সহকাৰী ষ্টেশ্যন অধীক্ষক সমীৰ অধিকাৰীয়ে যোৱা ৫ এপ্ৰিলৰ সন্ধিয়া ধৰ্ষণ কৰিছিল।
নাৰ্জাৰীয়ে জানিবলৈ দিয়ে যে ঘটনাৰ বলি হোৱা ছোৱালীজনীক অভিযুক্তই ঘটনাটো প্ৰকাশ নকৰিবলৈ ভাবুকি কৰিছিল যদিও তেওঁ অভিভাৱকৰ আগত ঘটনা সম্পৰ্কে সকলো বিবৰি কয়। ঘটনাটো পোহৰলৈ অহাৰ পিছত ছোৱালীজনীৰ অভিভাৱকে আৰক্ষীৰ ওচৰত অভিযোগ দাখিল কৰে।
শোণিতপুৰৰ অতিৰিক্ত আৰক্ষী অধীক্ষক নুমল মহট্টই জনায় যে অভিযুক্ত সমীৰ অধিকাৰীক আজি সন্ধিয়া গ্ৰেপ্তাৰ কৰা হৈছে আৰু আৰক্ষীৰ জিম্মাত ৰখা হৈছে। তেওঁ কয় যে ঘটনাটো যোৱা ৫ এপ্ৰিলত সংঘটিত হৈছিল আৰু আৰক্ষীয়ে আজি তথ্য লাভ কৰিছে।
অৱশ্যে, এবছুৰ কৰ্মীসকলে অভিযোগ কৰে যে অভিযুক্তক আটক কৰাৰ পৰিৱৰ্তে আৰক্ষীয়ে ওচৰৰে আছাম ৰাইফলছৰ শিৱিৰত আশ্ৰয় লৈ থকা ধৰ্ষণত অভিযুক্তগৰাকীক ৰক্ষণাবেক্ষণহে দিছিল।
ইয়াৰ মাজতে আজি ঢেকিয়াজুলি ৰে’ল ৰোড ষ্টেশ্যনত এবছু কৰ্মী আৰু স্থানীয় ৰাইজৰ তীব্ৰ প্ৰতিবাদৰ ফলত আৰক্ষীয়ে আবেলি অভিযুক্তক গ্ৰেপ্তাৰ কৰিবলৈ বাধ্য হয়। এবছু কৰ্মীসকলে অভিযুক্তক দৃষ্টান্তমূলক শাস্তি প্ৰদানৰ দাবী উত্থাপন কৰিছে আৰু আৰক্ষী প্ৰশাসনক এক নিৰপেক্ষ তদন্তৰ বাবে আহ্বান জনাইছে।
