বিজেপিৰ সকলো বিধায়কক তেওঁলোকৰ দুবছৰীয়া কাম- কাজৰ খতিয়ান দাঙি ধৰিবলৈ ৩০ জুলাইৰ সীমা বান্ধি দিয়া অসম ৰাজ্যিক বিজেপিৰ সভাপতি ৰঞ্জিত দাসক আজি কামৰ খতিয়ান দিলে পূব গুৱাহাটীৰ বিধায়ক সিদ্ধাৰ্থ ভট্টাচাৰ্যই।
উল্লেখযোগ্য যে আজি মহানগৰীৰৰ হেঙেৰাবাৰীস্থিত ৰাজ্যিক বিজেপিৰ মুখ্য কাৰ্যালয়ত এখন বিজেপিৰ ৰাজ্যিক সভাপতি ৰঞ্জিত দাস আৰু শিক্ষা মন্ত্ৰী সিদ্ধাৰ্থ ভট্টাচাৰ্য্যই এখন সংবাদমেল সম্বোধন কৰে। তাতে বিজেপিৰ ৰাজ্যিক সভাপতি ৰণজিৎ দাসে উন্মোচন কৰে বিধায়ক ভট্টাচাৰ্যৰ দুছৰীয়া কাম- কাজৰ খতিয়ান সন্নিৱিষ্ট পুস্তিকা।
জানিব পৰা মতে সোণোৱাল মন্ত্ৰী সভাৰ প্ৰথমগৰাকী বিধায়ক হিচাপে দ্বিতীয় বছৰৰ খতিয়ান দাঙি ধৰে মন্ত্ৰী সিদ্ধাৰ্থ ভট্টাচাৰ্যই।
এই সন্দৰ্ভত পূব গুৱাহাটী সমষ্ঠিৰ বিধায়ক গৰাকীয়ে কয় যে সুহৃদ আঁচনিৰ যোগেদি বিধায়কসকলে সমষ্টিৰ চিকিৎসাধীন লোকক অনুদান দিয়ে ৷ এইক্ষেত্ৰত মই ৫০লাখ টকা চিকিৎসা অনুদান আগবঢ়াইছো ভিন্ন জনৰ মাজত ৷ আনহাতে দুখীয়া ছাত্ৰ- ছাত্ৰীলৈও এইপৰ্যন্ত ৫০লাখ টকাৰ আৰ্থিক অনুদান আগবঢ়োৱা হৈছে।
মন কৰিবলগীয়া বিষয় এইটোৱে যে বিধায়ক হিচাপে সিদ্ধাৰ্থ ভট্টাচাৰ্যই কৰা কামৰ মূল্যাংকন কৰি ১০০ৰ ভিতৰত ১০০নম্বৰ দিয়ে সভাপতি ৰঞ্জিত দাসে। আনহাতে নিৰ্ধাৰিত সময়সীমাৰ ভিতৰত দলৰ আন বিধায়ক সকলেও নিজৰ নিজৰ কামৰ খতিয়ান দাঙি ধৰিব বুলি প্ৰকাশ কৰে বিজেপি সভাপতি গৰাকীয়ে।
