নগাঁওৰ ৰামানুজন জুনিয়ৰ কলেজৰ পৰা ৯৪.৮ শতাংশৰে বিজ্ঞান শাখাত সপ্তমস্থান লাভ কৰি নগাঁৱৰ লগতে নিজৰ জন্মস্থান বঙাইগাঁৱলৈ গৌৰৱ কঢ়িয়াই অনা মৃন্ময় দাসে ভৱিষ্যতে এগৰাকী সু-চিকিৎসক হোৱাৰ সপোন পুহি ৰাখিছে।
বঙাইগাঁও জিলাৰ যোগীঘোপা মেলেগৰৰ শিক্ষক টিকেন্দ্ৰ নাৰায়ণ দাস আৰু শিক্ষয়িত্ৰী মালা দাসৰ পুত্ৰ মৃন্ময়ে নিয়মীয়াকৈ ৫/৬ ঘন্টাকৈ অধ্যয়ন কৰিছিল আৰু পৰীক্ষাৰ আগৰে পৰা ১২/১৩ ঘন্টাকৈ অধ্যয়ন কৰিছিল।
মৃন্ময়ে কোনো ঘৰুৱা শিক্ষকৰ সহায় নোলোৱাকৈ এটা ভাল ফলাফল আশা কৰিছিল যদিও স্থান লাভ কৰিব বুলি ভবা নাছিল। আজৰি সময়ত সাধাৰণ জ্ঞানৰ কিতাপ পঢ়ি ভাল পোৱা মৃন্ময়ে মাজে মাজে ফেচবুক ব্যৱহাৰ কৰিছিল।
পাঠ্যপুথি ভালদৰে পঢ়িলেই ভাল ফলাফল লাভ কৰিব বুলি মন্তব্য কৰি মেধাৱী ছাত্ৰজনে কয়- ‘বজাৰত ওলোৱা বিভিন্ন নোটবুক ব্যৱহাৰ নকৰি ছাত্ৰ- ছাত্ৰীয়ে নিজৰ পাঠ্যপুথি ভালদৰে পঢ়িলেই উপকৃত হ’ব পাৰিব’।
উল্লেখ্য যে মৃন্ময়ে ইংৰাজীত ৮৬, অসমীয়াত ৯৮,পদাৰ্থ বিজ্ঞানত ৯৮, ৰসায়ন বিজ্ঞানত ৯৫, জীৱবিদ্যাত ৯৭, গণিতত ৮৫সহ সৰ্বমুঠ ৪৭৪ নম্বৰ পাইছে।
নাগৰিকত্ব সংশোধনী বিধেয়ক-২০১৬ ক বিৰোধিতা কৰি মৃন্ময়ে কয় যে বৰ্তমান সময়ত এই বিলখনৰ কথা আহিবই নালাগে। কাৰণ অসমত ৰাষ্ট্ৰীয় নাগৰিক পঞ্জীৰ কাম চলি আছে। এই ক্ষেত্ৰত চৰকাৰে গুৰুত্ব দিয়া উচিত। নাগৰিকত্ব প্ৰদানৰ ক্ষেত্ৰত হিন্দু- মুছলমান ভাগ ভাগ নকৰি ১৯৭১ চনৰ ২৫ মাৰ্চৰ আগত অহা সকলো লোককে বৈধতাৰ ভিত্তিত নাগৰিকত্ব দিব লাগে।
