‘ব্যতিক্ৰম মাসডো’ৰ দ্বাৰা আয়োজিত তিনি মাহজোৰা কাৰ্য্যসূচী ‘ন’ হৰ্ন প্লীজ’ আৰু শিল্পী ৰবীন বৰে লাভ কৰিলে জাতীয় অভিলেখৰ সন্মান। ‘আছাম বুক অব ৰেকৰ্ডছ’ৰ প্ৰতিষ্ঠাতা মঞ্জিত শৰ্মা দেৱে কয় ‘ব্যতিক্ৰম মাসডো-ৰ উদ্যোগত আয়োজিত ন’ হৰ্ন প্লীজ কাৰ্যসূচীয়ে অভূতপূৰ্ব সঁহাৰি লাভ কৰিছে। এনে কাৰ্যসূচী ভাৰতত আগেয়ে হাতত লোৱা হোৱা নাছিল। স্বাভাবিকভাৱেই শব্দ প্ৰদূষণৰ বিৰুদ্ধে সবাতোকৈ অধিক দিন ধৰি চলা কোনো কাৰ্যসূচী হিচাবে জাতীয় ৰেকৰ্ড গঢ়িছে ব্যতিক্ৰম মাসডোই।’
আজি গুৱাহাটী প্ৰেছ ক্লাৱত আয়োজিত এক সংবাদমেলত এই খবৰ দেখা মাত্ৰকে আনন্দিত হৈ ব্যতিক্ৰম মাসডো-ৰ সভাপতি ড০ সৌমেন ভাৰতীয়া দেৱে কয় যে, অভিলেখ বা সন্মান কিম্বা পুৰস্কাৰৰ আশাত আমি এই কাৰ্যসূচী হাতত লোৱা নাছিলো। ন’ হৰ্ন প্লীজ কাৰ্যসূচীত আমাৰ প্ৰধান লক্ষ্য আছিল গুৱাহাটী চহৰৰ শব্দ প্ৰদূষণ হ্ৰাস কৰা। আজি ৰাজ্য চৰকাৰৰ সহযোগত প্ৰতিটো ৰাস্তাৰ কাষত স্থান পাইছে ‘অনৰ্থক হৰ্ণ নবজাব’ চাইনবোৰ্ড সমূহে। আমাৰ কাৰ্যসূচীয়ে সকলোতে যে প্ৰভাৱ পেলাইছে দেখি আমি গৌৰাবান্বিত। আসাম বুক অব ৰেকৰ্ডছৰ স্বীকৃতিয়ে আমাক আৰু ভাল কাম কৰাৰ অনুপ্ৰেৰণা যোগাব।’
মঞ্জিত শৰ্মা দেৱে আৰু কয় যে, ‘ব্যতিক্ৰম মাসডো-ৰ ‘ন’ হৰ্ন প্লীজ’ ইতিমধ্যে তেওঁলোকৰ ৱেবচাইটত সংকলিত হৈছে। পৰৱৰ্তী সময়ত তেওঁলোকৰ যেতিয়া কিতাপ প্ৰকাশ কৰা হ’ব তেতিয়া এই কাৰ্যসূচীৰ কথা তাত উল্লেখ থাকিব। জাতীয় অভিলেখৰ স্বীকৃতিস্বৰূপে ‘ব্যতিক্ৰম মাসডো’ক এখন মানপত্ৰৰ লগতে অভিলেখৰ প্ৰমাণপত্ৰও আমাৰ ফালৰ পৰা দিয়া হৈছে। ইয়াত শিল্পী ৰবীন বৰকো স্বীকৃতি দিছে পেইন্টিঙৰ ইতিহাসত নতুন আলোড়ণ সৃষ্টি কৰা বাবে। তেখেতে মাত্ৰ ৩ মিনিটত ২×৩ ফুট কাগজত ৩০টা স্কেচ আঁকি উলিয়াইছে।
শিল্পী ৰবীন বৰ দেৱে কয় , ‘ইয়াৰ আগতে একেলগে দুহাতেৰে দুই ধৰণেৰে আঁকিছিলো। এইবাৰ দ্ৰুত গতিত অংকণ কৰিলো ত্ৰিশটা স্কেচ। ৰেকৰ্ডৰ কথা ভবা নাছিলো, নিজকে অলপ পৰীক্ষা কৰিলো, বেলেগ একো নহয়।’
আজি প্ৰেছ ক্লাৱত আয়োজিত সংবাদমেলত উপস্থিত আছিল পদ্মশ্ৰী সূৰ্য হাজৰিকা, ভাৰত সেৱাশ্ৰম সংঘৰ ডিমাপুৰ শাখাৰ প্ৰধান স্বামী চিন্ময়ানন্দ মহাৰাজ, সাহিত্যিক-সম্পাদক কনকসেন ডেকা, ইউনিয়ন কো-অপাৰেটিভ বেংকৰ চেয়াৰমেন অমৰেশ ৰয় প্ৰমুখ বিশিষ্ট ব্যক্তিসকল।
প্ৰবীণ সাহিত্যিক কনকসেন সেন ডেকাদেৱে কয় , ‘ব্যতিক্ৰম মাসডো-য়ে খুব ভাল কাম কৰিছে। কেৱল গুৱাহাটীতে নহয়, উত্তৰ-পূৰ্বৰ সকলো চহৰেই শব্দ প্ৰদূষণ মুক্ত হোৱা উচিত। তাৰ প্ৰথম পদক্ষেপ হ’ল ‘ন’ হৰ্ন’।’
ইউনিয়ন কো-অপাৰেটিভ বেংকৰ চেয়াৰমেন অমৰেশ ৰয়দেবে কয়, ‘প্ৰযুক্তি যিমানে উন্নত হৈছে বৃদ্ধি পাইছে শব্দৰ প্ৰাবল্য। ব্যতিক্ৰম-ৰ নো হৰ্ণ প্লিজ কাৰ্যসূচী গুৱাহাটী মহানগৰীত ভালেই প্ৰভাৱ পেলাইছে। এতিয়া নো হৰ্ণ লৈ সজাগ হ’ব লাগিব জনগণ।’
স্বামী চিন্ময়ানন্দ মহাৰাজ কয় যে ভাৰত সেৱাশ্ৰম সংঘৰ লগত ব্যতিক্ৰম মাসডোৰ সম্পৰ্ক ১৫ বছৰৰ। তেখেতে ব্যতিক্ৰম এনেদৰে সমাজিক কামত আগ বাঢ়ি যাবলৈ আশিৰ্বাদ কৰে।
পদ্মশ্ৰী সূৰ্য হাজৰিকা দেৱে কয় যে নতুন এটা ব্যতিক্ৰমী ঘটনাৰ সাক্ষী হ’ল অসমৰ জনগণ। ব্যতিক্ৰম আৰু ৰবীন বৰক আমাৰ শুভেচ্ছা তেওঁ শুভেচ্ছা জনায়।
উল্লেখ্য যে নতুন বছৰৰ প্ৰথম দিনা ৰাজভৱনৰ দৰৱাৰ হলৰ পৰা ফ্লেগ অফ্ কৰি ‘ন’ হৰ্ন প্লিজ’ কাৰ্যসূচীৰ উদ্বোধন কৰিছিল অসমৰ মহামান্য ৰাজ্যপাল জগদীশ মুখি দেৱে।
