ব্ৰহ্মপুত্ৰৰ প্ৰৱাল গৰাখহনীয়াৰ ফলত প্ৰায় নিঃশেষ হ’বলৈ ধৰিছে চামগুৰিৰ নিকটৱৰ্তী বুঢ়াচাপৰি বন্যপ্ৰাণী অভয়াৰণ্যৰ অন্তিম ৰক্ষা কৱচ ধনীয়া-জাৰণি নামৰ গাঁও। বিগত বছৰ সমূহত অভয়াৰণ্যখনক গৰাখহনীয়াৰ পৰা ৰক্ষা কৰি আহিছিল অভয়াৰণ্যখনৰ গাতে লাগি থকা একমাত্ৰ ৰক্ষা কৱচ স্বৰূপ উক্ত গাঁওখনে।
কিন্তু চলিত বছৰত আৰম্ভ হোৱা ব্যাপক গৰাখহনীয়াৰ কবলত পৰি গাঁওখনৰ অধিকাংশ মাটিকালিয়েই নিঃচিহ্ন হৈ পৰাত এতিয়া চৰম ভাবুকি নামি আহিছে বন্যপ্ৰাণী অভয়াৰণ্যখনলৈ। ব্ৰহ্মপুত্ৰৰ বিধ্বংসী গৰাখহনীয়াৰ বাবে ধনীয়া গাঁৱৰ প্ৰায় ৭০টা পৰিয়ালে যোৱা বছৰ আৰু চলিত বছৰত প্ৰায় ৫০টা পৰিয়ালে গাঁও এৰি যাবলৈ বাধ্য হৈছে।
কিন্তু ইয়াৰ পিছতো প্ৰশাসন তথা বন বিভাগে নিজৰ নিজৰ কৰণীয় দায়িত্ব স্বীকাৰ নকৰি পৰস্পৰে পৰস্পৰৰ গালৈ বোকা ছটিওৱাৰ বাবে গাঁওখনৰ একমাত্ৰ গাইড বান্ধটো নিঃচিহ্ন হৈ যায় ব্ৰহ্মপুত্ৰৰ বুকুত।
এতিয়া গাঁওখনত থকা বাকীসকল গঞাই চৰকাৰৰ প্ৰতি আশা-ভৰসা এৰি শৰণাপন্ন হৈছে ভগৱানৰ ওচৰত। শংকাত নিশা উজাগৰে কটোৱা গঞাই এতিয়া নৈ পাৰতে আৰম্ভ কৰিছে ব্ৰহ্মপুত্ৰ পূজন।
বুঢ়াচাপৰি বন্যপ্ৰাণী অভয়াৰণ্যৰ অন্তিম ৰক্ষা কৱচ স্বৰূপ ধনীয়া গাঁৱক কালৰূপী গৰাখহনীয়াৰ পৰা বচাবলৈ গাঁওবাসীয়ে এতিয়া ধূপ-দীপেৰে ব্ৰহ্মপুত্ৰ নদীক পূজা কৰা কাৰ্যই স্বাভাৱিকতে চৰকাৰৰ উন্নয়নৰ প্ৰকৃত স্বৰূপ উদঙাই দিছে।
