৭ম দৰমহা আয়োগৰ পৰামৰ্শাৱলী কাৰ্য্যকৰী কৰাৰ ক্ষেত্ৰত দেওবাৰে নিৰ্দিষ্ট সময়সীমা দাবী কৰিছে যোৱা এসপ্তাহ ধৰি ধৰ্মঘট কৰি থকা মণিপুৰ ৰাজ্যৰ চৰকাৰী কৰ্মচাৰীসকলে।
ধৰ্মঘটকাৰী কৰ্মচাৰীসকলৰ হৈ Joint Administrative Councilৰ সচিব এল বীৰেনে কয়, ‘বৰ্ধিত হাৰত দৰমহা আজিয়ে দিব লাগে বুলি আমি কোৱা নাই। মণিপুৰত ৭ম দৰমহা আয়োগৰ পৰামৰ্শাৱলী কেতিয়াৰ পৰা কাৰ্য্যকৰী হ’ব সেই সন্দৰ্ভত ৰাজ্য চৰকাৰে এক লিখিত প্ৰতিশ্ৰুতি দিয়াতো আমি বিচাৰিছো।’
সম্পদহীন ৰাজ্য হিচাপে মণিপুৰ প্ৰধানকৈ কেন্দ্ৰীয় চৰকাৰৰ ওপৰতে নিৰ্ভৰশীল আৰু সেয়ে ই বৰ্ধিত দৰমহা প্ৰদান কৰিব নোৱাৰে বুলি ৰাজ্যখনৰ মুখ্য মন্ত্ৰী বীৰেন সিঙে দেখুওৱা ‘অজুহাত’ৰ প্ৰসংগত বিকেনে কয় যে পূৰ্বৰ ৰাজ্য চৰকাৰে ৪ৰ্থ, ৫ম আৰু ৬ষ্ঠ দৰমহা আয়োগৰ পৰামৰ্শাৱলী কাৰ্য্যকৰী কৰিছিল।
উল্লেখযোগ্য যে শেহতীয়াকৈ শাসনলৈ অহা ত্ৰিপুৰাক বাদ দিও বিজেপিশাসিত কেবাখনো ৰাজ্যত ৭ম দৰমহা আয়োগৰ পৰামৰ্শাৱলী এতিয়ালৈকে কাৰ্য্যকৰী কৰা নাই।
মণিপুৰৰ All Manipur Trade Unions Council আৰু All Manipur Government Employees Organisationএ যোৱা ২২ মাৰ্চৰ পৰা যুটীয়াভাৱে এই ধৰ্মঘটৰ আহ্বান কৰিছিল।
