মহানগৰীৰ মালিগাঁৱৰ কামাখ্যা ৰে’লৱে ষ্টেচনত দুজন এন ডি এফ বিৰ সদস্যক মহনগৰ আৰক্ষীয়ে গ্ৰেপ্তাৰ কৰে।
প্ৰাপ্ত তথ্য মতে জালুকবাৰী আৰক্ষীয়ে এক গোপন সূত্ৰৰ পৰা ম্যানমাৰৰ পৰা অহা দুজন এন ডি এফ বিৰ সদস্য মহাগৰীত প্ৰৱেশ কৰা বুলি খবৰ লাভ কৰে। ফলত জালুকবাৰী আৰক্ষীয়ে তাৎক্ষণিকভাৱে মালিগাঁৱৰ ৰে’লৱে ষ্টেচনত অভিযান চলাই এন ডি এফ বিৰ সদস্য দুজনক আটক কৰিবলৈ সক্ষম হয়।
আৰক্ষীয়ে ধৃত এন ডি এফ বিৰ সদস্য দুজনৰ এজনক জয় সিং নাৰ্জাৰী ওৰফে জলিল আৰু আনজনক বিমল বসুমতাৰী বুলি চিনাক্ত কৰিছে।
আৰক্ষীয়ে জনোৱা অনুসৰি ধৃত জয় সিং নাৰ্জাৰী এন ডি এফ বি (সং) গোটৰ মূৰব্বী আই কে সংবিজিতৰ সম্পৰ্কীয় আৰু এন ডি এফ বিৰ সদস্য দুজনে লামডিং আলিপুৰদুৱাৰ এক্সপ্ৰেছেৰে আইজনৰ পৰা কোকৰাঝাৰলৈ ভ্ৰমণ কৰিছিল।
উল্লেখযোগ্য যে ধৃত এন ডি এফ বিৰ সদস্য দুজন এন ডি এফ বি (সং) গোটলৈ অস্ত্ৰ-শস্ত্ৰ সৰবৰাহৰ কাৰ্যত জড়িত আছিল আৰু দুয়ো ম্যানমাৰ আৰু মণিপুৰত সক্ৰিয় ৰূপত আছিল। তেওঁলোকে ম্যানমাৰৰ পৰা ওভটাৰ পিছত আন ৰাজ্যত প্ৰৱেশ কৰাৰ চেষ্টা কৰিছিল।
ইতিমধ্যে ধৃত দুয়ো এম ডি এফ বিৰ সদস্যকে আৰক্ষী জিন্মাত ৰাখি তেওঁলোকৰ পৰা আৰু অধিক তথ্য উদ্ধাৰৰ বাবে আৰক্ষীয়ে জেৰা অব্যাহত ৰাখিছে।
