বিমানসেৱা প্ৰত্যাহাৰ কৰাৰ বাবে ক্ষুব্ধ হৈ মিজোৰাম অভিমুখী যাত্ৰীয়ে ব্যক্তিগত বিমানসেৱা জেট এয়াৰৱেজৰ বিৰুদ্ধে শুকুৰবাৰে আনুষ্ঠানিকভাৱে অভিযোগ দাখিল কৰে।
ক্ষুব্ধ যাত্ৰীসকলে অভিযোগ কৰে যে বিমান কৰ্তৃপক্ষই মিজোৰামলৈ অহা-যোৱা কৰা বিমানসমূহ সঘনাই নিলম্বন কৰা কাৰ্য অত্যন্ত দুৰ্ভাগ্যজনক।
জেট এয়াৰৱেজে দিল্লীৰ পৰা আইজললৈ দুদিন নিৰ্দিষ্ট সময়ত উৰিবলগীয়া বিমান বাতিল কৰাৰ ফলত যাত্ৰীসকল চৰম অসুবিধাৰ সন্মুখীন হৈছিল। বিমানসেৱা কৰ্তৃপক্ষই বিমানসেৱা প্ৰত্যাহাৰ কৰাৰ কাৰণ হিচাপে বেয়া বতৰৰ কথা ব্যক্ত কৰিছিল।
খ্ৰীষ্টমাছৰ বাবে ঘৰলৈ আহিবলগীয়া যাত্ৰীসকলৰ বাবে ই চৰম বিপৰ্যয়ৰ সৃষ্টি কৰিছে।
খ্ৰীষ্টান ধৰ্মাৱলম্বী অধ্যুষিত ৰাজ্য মিজোৰামৰ অতি গুৰুত্বপূৰ্ণ উৎসৱ খ্ৰীষ্টমাছৰ বাবে দিল্লীৰ পৰা ঘৰ অভিমুখী প্ৰায় ৩২০ গৰাকী যাত্ৰী আছিল।
ইয়াৰ মাজতে যাত্ৰীসকলে উল্লেখ কৰে যে যিসময়ত জেট এয়াৰৱেজে বেয়া বতৰৰ বাবে বিমানসেৱা নিলম্বনৰ কথা ব্যক্ত কৰিছিল, সেইদিনাই এয়াৰ ইণ্ডিয়াৰ এখন বিমানে আইজলৰ লেংপুই বিমানবন্দৰত সফলতাৰে অৱতৰণ কৰিছিল।
যাত্ৰীসকলে লগতে অভিযোগ কৰিছিল যে জেট এয়াৰৱেজে দিল্লীৰ পৰা আইজললৈ, গুৱাহাটীৰ পৰা আইজললৈ আৰু আইজলৰ পৰা দিল্লীলৈ যাবলগীয়া বিমানসমূহ প্ৰত্যাহাৰ কৰাটো এটা নিয়মিত ঘটনা হৈ পৰিছে।
তাৎপৰ্যপূৰ্ণভাৱে, অতিৰিক্ত বিমানৰ যোগাৰ কৰি দিয়াৰ দায়িত্ব থকা জেট এয়াৰেৱজ কৰ্তৃপক্ষই সেয়া কৰিবলৈ অমান্তি হয় আৰু যাত্ৰীসকলক পথ পৰিৱহনেৰে লক্ষ্যস্থানলৈ যোৱাৰ বাবে পৰামৰ্শ দিয়ে। তদুপৰি, যাত্ৰীসকলক শলঠেকত পেলাই জেট এয়াৰৱেজ কৰ্তৃপক্ষই আনকি যাত্ৰীসকলৰ থকাৰ ব্যৱস্থাও প্ৰদান নকৰিলে।
একাংশ ক্ষুব্ধ যাত্ৰীয়ে লগতে অভিযোগ কৰে যে উত্তৰ-পূবৰ যাত্ৰীসকল প্ৰায়েই ব্যক্তিগত খণ্ডৰ বিমান কৰ্তৃপক্ষৰ দ্বাৰা অৱহেলিত হৈ আহিছে।
