দেশৰ মুখ্য নিৰ্বাচন আয়ুক্ত এ কে জ্যোতিৰ নেতৃত্বত নিৰ্বাচন আয়োগৰ এটা সম্পূৰ্ণ দল অহা ২২ আৰু ২৩ ডিচেম্বৰত মেঘালয়লৈ আহিব। নিৰ্বাচন অনুষ্ঠিত হ’বলগা মেঘালয়লৈ নিৰ্বাচন সম্পৰ্কীয় প্ৰস্তুতিৰ সকলো দিশ পৰ্যালোচনা কৰিবলৈ আহিবলগীয়া নিৰ্বাচন আয়োগৰ দলটোত মুখ্য নিৰ্বাচন আয়ুক্তৰ বাহিৰেও নিৰ্বাচন আয়ুক্তদ্বয় ওম প্ৰকাশ আৰু সুনীল আৰোৰা সমন্বিতে আয়োগৰ জ্যেষ্ঠ বিষয়াসকল থাকিব। নিৰ্বাচন আয়োগৰ দলটোৱে ৰাজ্যখনৰ বিভিন্ন ৰাজনৈতিক দল, চৰকাৰী বিষয়া, শীৰ্ষ প্ৰশাসনিক তথা আৰক্ষী বিষয়াসকলৰ সৈতে ৰাজ্যখনৰ নিৰ্বাচনৰ প্ৰস্তুতি সম্পৰ্কে কোইবালানিও আলোচনাত অংশ গ্ৰহণ কৰিব।
এই বৈঠকৰ পিছতে নিৰ্বাচন আয়োগে অহা জানুৱাৰি মাহৰ প্ৰথমভাগত মেঘালয় নিৰ্বাচনৰ দিন ঘোষণা কৰাৰ সম্ভাৱনা আছে।
নিৰ্বাচন আয়োগৰ দলটোৱে ২২ ডিচেম্বৰত বিভিন্ন ৰাজনৈতিক দলবোৰৰ লগতে মুখ্য নিৰ্বাচন বিষয়া ফ্ৰেডেৰিক খাৰকংগৰ, জ্যেষ্ঠ আৰক্ষী বিষয়া, উপায়ুক্ত আৰু আৰক্ষী অধীক্ষকসকলৰ সৈতে বৈঠকত মিলিত হ’ব। ইয়াৰ পিছতে ২৩ তাৰিখে তেওঁলোকে মুখ্য সচিব আৰু আৰক্ষী সঞ্চালক প্ৰধানগৰাকীৰ সৈতে আন এক বৈঠকত মিলিত হ’ব।
অহা বছৰৰ মাৰ্চ মাহৰ ৬ তাৰিখে কাৰ্যকাল সমাপ্ত হ’বলগীয়া বিধানসভাৰ নতুন নিৰ্বাচনী প্ৰক্ৰিয়াটো সুচাৰুৰূপে অনুষ্ঠিত কৰাৰ বিষয়ত সামগ্ৰিক প্ৰস্তুতি সম্পৰ্কে বৈঠকত পৰ্যালোচনা কৰা হ’ব।
এই মাহৰ প্ৰথম ভাগত নিৰ্বাচন আয়োগৰ দলটোৱে নিৰ্বাচন অনুষ্ঠিত হ’বলগা আন দুখন ৰাজ্য নাগালেণ্ড আৰু ত্ৰিপুৰা ভ্ৰমণ কৰিছিল। উত্তৰ পূৰ্বাঞ্চলৰ তিনিখন ৰাজ্যতে অহা ফ্ৰেব্ৰুৱাৰি মাহত নিৰ্বাচন অনুষ্ঠিত হোৱাৰ সম্ভাৱনা আছে।
এগৰাকী নিৰ্বাচন বিষয়াই জানিবলৈ দিয়ে যে সকলো ৰাজনৈতিক দলৰে সৈতে অনুষ্ঠিত হ’বলগা বৈঠকত ইভিএম আৰু ভিভিপিএটিৰ কাৰ্যকাৰিতা সম্পৰ্কে ব্যাখ্যা কৰা হ’ব।
ইয়াৰ মাজতে গুজৰাট আৰু হিমাচল প্ৰদেশৰ নিৰ্বাচনত গুৰুত্বপূৰ্ণ বিজয় সাব্যস্ত কৰি উৎসাহী তথা আত্মবিশ্বাসী হৈ থকা বিজেপি দলে এতিয়া নিৰ্বাচন অনুষ্ঠিত হ’বলগা উত্তৰ পূৰ্বাঞ্চলৰ ৰাজ্যকেইখনত দৃষ্টি নিবদ্ধ কৰিছে। বিশেষকৈ শক্তিশালী প্ৰতিষ্ঠান বিৰোধী ঢৌ দেখিবলৈ পোৱা মেঘালয়ৰ নিৰ্বাচনকলৈ দলটো উৎসাহী হৈ পৰিছে।
ৰাজ্যিক বিজেপিৰ সভাপতি ছিবুন লিংডোই কয় যে নিৰ্বাচনৰ দিন ঘোষণা কৰাৰ পিছতেই প্ৰাৰ্থীৰ তালিকাখন প্ৰকাশ কৰা হ’ব।
ইয়াৰ বিপৰীত কংগ্ৰেছে কৈছে যে গুজৰাট আৰু হিমাচল প্ৰদেশৰ নিৰ্বাচনত বিজয়ী হ’লেও বিজেপিয়ে মেঘালয়ত বিজয়ী হোৱা সম্ভৱ নহয়। কংগ্ৰেছৰ মুখপাত্ৰ তথা ৰাজ্যৰ মন্ত্ৰী ৰনী ভি লিংডোৱে কয় যে বিজেপিয়ে ৰাজ্যখনত কোনো সুযোগ গ্ৰহণ কৰিব নোৱাৰে কিয়নো তেওঁলোকৰ দুমুখীয়া চৰিত্ৰ ওলাই পৰিছে।
