৬৯ সংখ্যক ষ্ট্ৰাণ্ডা স্মৃতি বক্সিং টুৰ্নামেণ্টৰ ফাইনেলত পৰাজয় বৰণ কৰাৰ লগে লগে মেৰীকমৰ ক্ৰমাগত তৃতীয়টো আন্তঃৰাষ্ট্ৰীয় সোণৰ পদক অৰ্জন কৰাৰ সপোন চূৰ্ণ-বিচূৰ্ণ হয়।
পাঁচবাৰৰ বিশ্ব চেম্পিয়ন তথা মণিপুৰৰ মহিলা বক্সাৰ এম চি মেৰীকমে বুলগেৰিয়াত চলা এই প্ৰতিযোগিতাখনৰ ফাইনেলত ঘৰুৱা তথা বুলগেৰিয়াৰ খেলুৱৈ চেভদা এচেন’ভাৰ হাতত পৰাজয় বৰণ কৰে।
প্ৰতিযোগিতাখনৰ ফাইনেলত মেৰীকমে পৰাজিত হোৱাত ৰূপৰ পদকতে সন্তুষ্ট থাকিবলগীয়া হয়।
মন কৰিবলগীয়া যে ফাইনেল মেচখনৰ বেছিভাগ বাউটতে অলিম্পিক ব্ৰঞ্জ পদক বিজয়ী মেৰীকমে এচেন’ভাক বক্সিং ৰিঙত থকা-সৰকা কৰা পৰিলক্ষিত হৈছিল।
ভাৰতীয় বক্সিং জগতৰ তাৰকা মেৰীকমে মেচখনত অতি আক্ৰমণাত্মকভাবে বক্সিং ৰিঙত নিজৰ প্ৰদৰ্শন আগবঢ়াই যদিও বিচাৰকে মেচখনৰ ফলাফল ঘোষণা কৰাৰ লগে লগে উপস্থিত সকলো দৰ্শক আচৰিত হৈ উঠে। কিয়নো বেছিভাগ সময়ে মেৰীকমে দমন কৰি থকা মেচখন বিচাৰকে এচেন’ভাৰ পক্ষত ঘোষণা কৰাত ভাৰতীয় শিবিৰ যথেষ্ট হতাশাগ্ৰস্ত হোৱা পৰিলক্ষিত হয়।
উল্লেখ্য যে এম চি মেৰীকমে বুলগেৰিয়াত অনুষ্ঠিত বক্সিং প্ৰতিযোগিতাখনৰ পূৰ্বে এছিয়ান চেম্পিয়নশ্বিপ আৰু ইণ্ডিয়া অ’পেনত একোটাকৈ স্বৰ্ণ পদক লাভ কৰিবলৈ সক্ষম হৈছিল।
৬৯ সংখ্যক ষ্ট্ৰাণ্ডা স্মৃতি বক্সিং টুৰ্নামেণ্টত ভাৰতীয় মহিলা বক্সাৰে দুটা ৰূপ আৰু চাৰিটা ব্ৰঞ্জৰ পদকেৰে প্ৰতিযোগিতাখনৰ সফল সামৰণি পেলায়।
স্মৰ্তব্য যে ইউৰোপৰ আটাইতকৈ পুৰণি এই বক্সিং প্ৰতিযোগিতাখনত মণিপুৰৰ এইগৰাকী ৩৫ বৰ্ষীয় বক্সাৰ তথা অন্য বক্সাৰৰ উজ্জীৱিত প্ৰদৰ্শনত স্বাভাৱিকতে ভাৰতীয় ক্ৰীড়া জগতৰ বাবে সুখবৰ কঢ়িয়াই আনিছে।
